ԱԺ պատգամավոր Թագուհի Թովմասյանը ստորագրահավաք է իրականացնում՝ Բերձորում Ադրբեջանի կողմից ապօրինի տեղադրված անցակետը հանելու պահանջով: Ստորագրահավաքն անցկացվում է Թումանյան-Աբովյան փողոցների խաչմերուկում գտնվող «Կինոմոսկվայի հրապարակ»-ում։
«Արցախահայերը ևս սկսել են ստորագրահավաք և փորձում են Արցախի էթնիկ զտման վրա մեծ ուշադրություն դարձնել, քանի որ Ադրբեջանի քաղաքականությունը օրըստօրե էլ ավելի լկտի է դառնում և փորձում են Արցախը զրկել արցախահայերից, ամեն ինչ անում են, որ Արցախը դատարկվի»,- նշեց Թագուհի Թովմասյանը։
Նրա խոսքով՝ իր այս քայլով ինքը ցանկանում է միանալ արցախահայերի պահանջին՝ հեռացնել Լաչինի միջանցքում տեղադրված ապօրինի անցակետը։ «Ցանկացած հայ պետք է այս պահանջը ներկայացնի, քանի որ կորցնելով Արցախը լրջագույն վտանգ ենք հասցնելու հենց Հայաստանի Հանրապետությանը։ Արցախն էր Հայաստանի անվտանգության երաշխավորը, այլ ոչ թե հակառակը։ Մենք հիմա կորցրել ենք Արցախը և իմ ծննդավայր Վարդենիսը վտանգված է և ամեն օր կրակում են»,- ասաց Թագուհի Թովմասյանը։
Անդրադառնալով ՀՀ իշխանություններին, նա ասաց. «Ես կարծում եմ՝ իշխանություններն ինչքան քիչ խոսեն, մեր գործերն այդքան լավ կլինի, որովհետեւ ինչքան խոսում են, այնքան բարդանում է մարդկանց բացատրել, որ Արցախը հայկական է, այնտեղ պետք է ապրեն հայեր եւ որեւէ դեպքում նրանք չեն կարող դիտարկվել Ադրբեջանի կազմում որպես փոքրամասնություն»: Սա պետք է ընդունեն ոչ միայն իշխանությունները, այլեւ բոլոր այն ուժերը, որոնք բանակցությունների են մասնակցում: Չպետք է թույլ տալ, որ անգամ այդպիսի խոսակցություն ծավալվի»:
Նա նշեց, որ մինչեւ ժամը 19-ը կիրականացվի ստորագրահավաքը, իսկ վաղը ժամը 12-ից կշարունակվի»:
