Վարչապետ Ֆիալային շնորհակալություն եմ հայտնել Հայաստանի ժողովրդավարությանն աջակցելու համար. այդ համատեքստում ընդգծել եմ Չեխիայի աջակցությունը Հայաստանի տարածքում Ադրբեջանի հետ սահմանի երկայնքով ԵՄ երկարաժամկետ մոնիտորինգի առաքելություն տեղակայելու որոշմանը: Այս մասին, այսօր՝ մայիսի 4-ին, Պրահայում Չեխիայի վարչապետ Պետր Ֆիալայի հետ համատեղ ասուլիսի ժամանակ նշեց ՀՀ վարչապետ Նիկոլ Փաշինյանը:
«Ցավով պետք է նշեմ, որ ի հեճուկս բոլոր ջանքերի, իրավիճակը մեր տրածաշրջանում շարունակում է մնալ լարված: Դրա պատճառն այն է, որ չնայած հայտնի պայմանավորվածություններին, Ադրբեջանը շարունակում է ուժի եւ ուժի սպառնալիքի կիրառման քաղաքականությունը՝ անընդհատ էսկալացնելով իրավիճակը Հայաստանի հետ սահմանին, ԼՂ-ում եւ Լաչինի միջանցքում:
Լաչինի միջանցքում անցակետ տեղադրելու Ադրբեջանի որոշումը եւ դրան նախորդած միջանցքի արգելափակումը նոյեմբերի 9-ի եռակողմ հայտարարության եւ Արդարադատության միջազգային դատարանի փետրվարին կայացրած որոշման կոպիտ խախտում է: Արդեն 4 ամիս ԼՂ ժողովուրդը զրկված է ազատ տեղաշարժի հնարավորությունից: Ավելին, Ադրբեջանը խափանել է ԼՂ-ի բնական գազի եւ էլեկտրաէներգիայի մատակարարումը: Սնունդը ԼՂ-ում վաճառվում է կտրոններով եւ այսպիսով այնտեղ հաստատված է հումանիտար ճգնաժամ»,-ասաց Փաշինյանը:
Նա հավելեց, որ միջազգային հանրությունը պետք է իրավիճակի հստակ ու հասցեական գնահատական տա. «Մանավանդ, որ մեր գնահատմամբ Ադրբեջանի այդ գործողությունները ԼՂ-ում հայերի էթնիկ զտումներ իրականացնելու նախապատրաստություններ են: Այս համատեքստում ԼՂ եւ Լաչինի միջանցք միջազգային փաստահավաք խմբի առաքումը համարում ենք անհրաժեշտ:
Միաժամանակ, ի հեճուկս բոլոր դժվարությունների, ՀՀ կառավարությունը որդեգրել է խաղաղության օրակարգը. Մենք կարծում ենք, որ խաղաղությունը մեր տարածաշրջանում այլընտրանք չունի, եւ ոչ միայն նպատակ է, այլեւ միջոց ժողովուրդների ու պետությունների հարաբերությունների կարգավորման եւ հետագա զարգացման համար:
Մենք լիարժեք ներգրավված ենք Ադրբեջանի հետ բանակցային գորընթացում եւ առաջիկայում էլ ներգրավված կմնանք՝ տրամադրված լինելով արդյունքներ գրանցել եւ ոչ թե բանակցել բանակցելու համար:
Այս նպատակին հասնելու համար մենք հույս ունենք, որ Ադրբեջանը կհրաժարվի ուժի եւ ուժի սպառնալիքի կիրրառման քաղաքականությունից եւ ակնկալում ենք, որ միջազգային հանրությունը նույնպես Ադրբեջանինուղղված նման ուղերձով հանդես կգա»,-ընդգծեց ՀՀ վարչապետը:
