Լաչինի միջանցքի արգելափակումը և այլ իրադարձությունները Լեռնային Ղարաբաղում էթնիկ զտումների նախապատրաստություն են։ Այս մասին մայիսի 4-ին Պրահայի Անդրատլանտյան հարաբերությունների կենտրոնում տեղի ունեցած քննարկման ժամանակ ասել է ՀՀ վարչապետ Նիկոլ Փաշինյանը։
Միաժամանակ, նա կարծում է, որ բոլոր հարցերը պետք է լուծվեն բանակցությունների և խաղաղ գործընթացի միջոցով։
«Մենք հավատարիմ ենք այս գործընթացին՝ չնայած մարտահրավերներին», - ավելացրել է նա:
Փաշինյանը հավելել է, որ Ստեփանակերտի և Բաքվի բանակցությունների ընթացքում պետք է անդրադառնալ Լեռնային Ղարաբաղի հայերի անվտանգությանն ու իրավունքներին։
«Լեռնային Ղարաբաղի հայերի անվտանգությանն ու իրավունքներին առնչվող բոլոր հարցերը պետք է լուծվեն այս ձևաչափով։ Բայց, ցավոք, մենք չենք տեսնում Ադրբեջանի պատրաստակամությունը՝ երկխոսության գնալ Լեռնային Ղարաբաղի հայերի հետ։ Սա կարևոր է տարածաշրջանում կայուն խաղաղության ճանապարհին։ Մենք պետք է ձգտենք խաղաղության։ Սրա վրա աշխատել ենք 30 տարի, և պետք է կրկնապատկենք մեր ջանքերը»,- ընդգծել է նա։
