Եթե Թուրքիայում հաղթի ընդդիմությունը, ապա երկրի տեղաշարժ տեղի կունենա դեպի Արեւմուտք, ավելի սառը, ավելի պրագմատիկ հարաբերություններ կլինեն Ռուսաստանի հետ։ Այս մասին NEWS.am-ի «Ուժի գործոն» հաղորդման եթերում ասել է Կարնեգի հիմնադրամի առաջատար գիտաշխատող, ղարաբաղյան հակամարտության փորձագետ Թոմաս դե Վաալը։
Նրա գնահատմամբ՝ Էրդողանի եւ Ալիեւի անձնական հարաբերություններն այլեւս չեն լինելու ադրբեջանա-թուրքական հարաբերությունների հիմքում, այդ հարաբերություններին ավելի պրագմատիկ մոտեցում է լինելու։
«Բացի այդ, հայ-թուրքական հարաբերությունների կարգավորման ավելի ակտիվ գործընթաց է լինելու։ Այս բոլոր փոփոխությունները միանգամից չեն լինի»,- կարծում է փորձագետը։
Նա կարծում է, որ Արևմուտքի և Ռուսաստանի հարաբերությունների ներկայիս դինամիկան հաստատված է դեռ երկար տարիների համար։
«Չեմ կարծում, որ Ուկրաինայում հակահարձակումը որևէ բան կփոխի։ Եթե Ռուսաստանի համար խոշոր պարտություն լինի, ապա, իհարկե, իրավիճակը կփոխվի, բայց կարծում եմ, որ մոտ ապագայում դա ոչ ոք չի սպասում»,- հավելել է Թոմաս դե Վաալը։
