Ստեփանակերտի Գրիգոր Նարեկացի պետհավատարմագրված համալսարանում այսօր՝ մայիսի 11-ին, այց է կացվել գիտաժողով` նվիրված Հայոց ցեղասպանության 108-րդ տարելիցին: «Արցախպրես»-ի թղթակցի հաղորդմամբ՝ գիտաժողովը կրում էր «Արցախում էթնիկ զտման Ադրբեջանի քաղաքականությունը» խորագիրը:
Նախքան միջոցառման մեկնարկը ներկաները հարգանքի տուրք են մատուցել բուհի նախկին ռեկտոր, Արցախի Հանրապետության գրողների միության նախկին նախագահ, բանաստեղծ Վարդան Հակոբյանի հիշատակին: Այնուհետև բացման խոսքով հանդես է եկել ռեկտոր Սևակ Հակոբյանը՝ գիտաժողովի ընթացքում արդյունավետ աշխատանք ու քննարկումներ ակնկալելով։
«Թեման, իրոք, առավել քան արդիական է, և ցավով փաստում ենք, որ դարավոր մեր հիմնախնդիրները ոչ միայն չեն լուծվել, այլև տեսնում ենք դրանց սրացող դինամիկան, և կա ցեղասպանության վտանգ»,-նշել է Ս. Հակոբյանը։
Արցախի Հանրապետության Կրթության, գիտության, մշակույթի և սպորտի նախարար Նորայր Մկրտչյանն ընդգծեց, որ գիտաժողովի խորագիրը փաստում է քննարկվող թեմայի կարևորությունը:
«Վերջին շրջանում տեղի ունեցած քաղաքական գործընթացները միանգամայն նոր մարտահրավերների առաջ են կանգնեցրել մեր հանրությանը։ Փաստացիորեն քաղաքակիրթ աշխարհի համակ ուշադրության պայմաններում Ադրբեջանը, նվաճելով մեր հայրենիքի զգալի մասը, աննախադեպ մասշտաբների հասցնելով հայատյացության քաղաքականությունը և քարոզչությունը, զուգահեռաբար ձեռնամուխ է եղել նաև հայկական պատմամշակութային ժառանգության բացահայտ ոչնչացմանը, ինչն էլ ավելի է խորացնում հակամարտությունը և ընդգծում Արցախի Հանրապետության անկախության անհրաժեշտությունն ու հրատապությունը»,-նշել է նախարարը:
Զեկուցումներով հանդես են եկել ԳՆՀ Իրավագիտության ամբիոնի վարիչ, ԱՀ վաստակավոր իրավաբան Վլադիմիր Հովսեփյանը՝ «Ցեղասպանության ուրվականը Բերձորի միջանցքում» թեմայով, ԱՀ նախագահի հատուկ հանձնարարությունների գծով խորհրդական, պատմական գիտությունների դոկտոր Դավիթ Բաբայանը՝ «Խորհրդային շրջանում Ադրբեջանի խտրական քաղաքականությունը Լեռնային Ղարաբաղի նկատմամբ` որպես Բաքվի քաղաքականության հայելին ներկայիս ժամանակաշրջանում» թեմայով, ԱՀ ԿԳՄՍ նախարարի տեղակալ, պատմական գիտությունների թեկնածու Լեռնիկ Հովհաննիսյանը՝ «Մշակույթի ժառանգության պահպանման վտանգները 44-օրյա պատերազմից հետո» թեմայով, Իրավագիտության ամբիոնի դասախոս, իրավաբանական գիտությունների թեկնածու, ԱՀ վաստակավոր իրավաբան Գրետա Արզումանյանը՝ «ԼՂ ինքնավար մարզի իրավակիրառ պրակտիկան Խորհրդային Ադրբեջանի հակահայ դրսևորումների լույսի ներքո» թեմայով, ԱրՊՀ պատմության և քաղաքագիտության ամբիոնի վարիչ, պատմական գիտությունների թեկնածու, դոցենտ Նունե Սարումյանը՝ «Ադրբեջանի հայահալած քաղաքականության դրսևորումները ԼՂԻՄ-ի սոցիալ-տնտեսական և հասարակական քաղաքական կյանքում» թեմայով:
Գիտաժողովի վերջում բուհի ռեկտոր Սևակ Հակոբյանը հավաստագրեր է հանձնել բոլոր զեկուցողներին։
