ԱՄՆ-ում մայիսի 12-ից ուժի մեջ է մտել կորոնավիրուսի դեմ պարտադիր պատվաստման պահանջի չեղարկումը երկիր եկող օտարերկրյա քաղաքացիների համար։ Այս մասին տեղեկացրել է Սպիտակ տունը։

Պահանջն այլեւս չի տարածվում նաեւ դաշնային գերատեսչությունների աշխատակիցների եւ պայմանագրով դաշնային աշխատողների վրա։

Պահանջը Նահանգներում մտցվել էր 2021թ. նոյեմբերին։ Վավեր էին ճանաչվում միայն կատարված պատվաստման մասին այն տեղեկանքները, որոնք արժանացել էին ԱՄՆ բժշկական կարգավորողի կամ Առողջապահության համաշխարհային կազմակերպության հավանությանը։

Մայիսի 5-ին ԱՀԿ-ն հայտարարել է կորոնավիրուսի համավարակի ավարտի մասին։ Արտակարգ իրավիճակի ռեժիմը, որը գործում էր 2020 թվականից, հանվել է։