Հայաստանը բազմիցս ընդունել է Ադրբեջանի տարածքային ամբողջականությունը, բայց Արցախն իր տարածքն ու իր կարգավիճակն ունի։ Այս մասին Ազգային ժողովում, լրագրողների հետ զրույցում, մայիսի 15-ին ասել է պաշտպանության եւ անվտանգության խորհրդարանական մշտական հանձնաժողովի նախագահ, կառավարող «Քաղաքացիական պայմանագիր» խմբակցության պատգամավոր Անդրանիկ Քոչարյանը։
Լրագրողները, մասնավորապես, հետաքրքրվել են. կարելի՞ է արդյոք արձանագրել, որ Հայաստանը չի ճանաչել Արցախն Ադրբեջանի կազմում։ «Բանակցություններ են ընթանում, եւ երբ հրապարակվի փուլային ռազմավարությունը, այդ ժամանակ էլ կարելի կլինի որեւէ բան արձանագրել»,- ասել է Քոչարյանը։
Նրա խոսքով՝ այսօր Արցախն ամենաանկախ պետությունն է։ «Եվ, ամենայն հավանականությամբ, այն կմնա այդպիսին առաջիկա 3-4 տարիներին»,- նշել է խորհրդարանական հանձնաժողովի ղեկավարը։
Լրագրողի նկատառմանը, թե Հայաստանի իշխանությունները չեն բարձրացնում Արցախի ինքնորոշման հարցը, Քոչարյանն ասել է. «Արցախի ժողովուրդը որեւէ այլ հարց չի դրել՝ դրանից բացի»։ Ի պատասխան այն հարցի, թե արդյոք Արցախը այսօրվա դրությամբ հայկական է, պատգամավորն ասել է. «Քանի դեռ այնտեղ ապրում է հայ բնակչությունը՝ հանձինս 120 հազար մարդու, այն հայկական է»։
«Այն մերն է այնքան ժամանակ, քանի դեռ մեր ժողովուրդն այնտեղ ապրում է։ Եթե նա այնտեղ չլինի, այդ ժամանակ դժվար կլինի ասել»,- նշել է խորհրդարանականը։
Նա նաեւ Ադրբեջանին կոչ է արել ճանաչել Հայաստանի տարածքային ամբողջականությունը։