Կարմիր խաչի միջնորդությամբ այսօր՝ մայիսի 17-ին, առաջնային պարագաներ եւ դեղորայք են ուղարկվել Լաչինի միջանցքով։ Այս մասին NEWS.am-ի հետ զրույցում նշեց ԿԽՄԿ հայաստանյան գրասենյակի հաղորդակցման և կանխարգելման ծրագրերի ղեկավար Զառա Ամատունին։
«Հույս ունենք, որ մյուս գործողությունները նույնպես կկարողանանք իրականացնել»,- ասաց Զառա Ամատունին։
Ավելի վաղ NEWS.am-ը հայտնել էր, որ Լաչինի միջանցքով ԿԽՄԿ-ի միջնորդությամբ մարդասիրական օգնությունը ապրիլի 29-ից դադարեցված է: Խնդիրն առաջացել է Ադրբեջանի կողմից Լաչինի միջանցքում անցակետ տեղադրելուց հետո։
ԿԽՄԿ-ից հայտնել էին, որ կապված Լաչինի միջանցքի երկայնքով նոր զարգացումների հետ՝ «Կարմիր խաչի» միջազգային կոմիտեն շարունակում է իր երկխոսությունը համապատասխան որոշում կայացնողների հետ, որպեսզի ճշգրտի իր ընթացակարգերին և կարողանա վերսկսել գործունեությունը, որը կատարել էր դեկտեմբերի 19-ից ի վեր:
