ԱՄՆ նախագահ Ջո Բայդենի վարչակազմն Իսրայելին մի քանի շաբաթ առաջ առաջարկել է համատեղ իրականացնել Իրանի վերաբերյալ ռազմական պլանավորում, տեղեկացրել է Axios պորտալը՝ հղում կատարելով երկու երկրների պաշտոնյաներին։
ԱՄՆ պաշտոնյաները նշել են, որ առաջարկությունն աննախադեպ է եւ կարող է լրջորեն ամրապնդել ԱՄՆ-ի եւ Իսրայելի ռազմական համագործակցությունը, ընդգծվել է հրապարակման մեջ։ Այս առաջարկը «չի վերաբերում Իրանի միջուկային օբյեկտներին ԱՄՆ-ի եւ Իսրայելի համատեղ որեւէ հարվածի պլանավորմանը»։ Այն իբր կոչված է «հավաստիացնել Իսրայելին ԱՄՆ ռազմական աջակցության հարցում»։
Ինչպես կարծում է պորտալի ԱՄՆ պաշտոնյա զրուցակիցներից մեկը, համատեղ պլանավորումը նշանակում է, որ կողմերը կներկայացնեն իրենց պլանները չկանխատեսված տարբեր իրավիճակների դեպքում եւ կարող են քննարկել, թե ինչպես լավագույն ձեւով լուծեն տարբեր հարցեր, որոնք կարող են առաջանալ տարածաշրջանում՝ Իրանի գործողությունների հետ կապված։
Axios-ի տվյալներով՝ իսրայելցի պատոնյաներն առայժմ առաջարկին կասկածով են վերաբերվում։ Նրանք մտավախություն ունեն, որ դա «Իսրայելի ձեռքերը կապելու» փորձ է՝ երկիրն Իրանի, հատկապես միջուկային օբյեկտների դեմ գործողություններից հետ պահելու համար, եթե ԱՄՆ-ն առարկի։ Հրեական պետության իշխանությունները չեն մերժել գաղափարը, բայց խնդրել են պարզաբանումներ, թե գործնականում ինչ կնշանակի ռազմական պլանավորումը, նշվել է հրապարակման մեջ։
Առաջարկն արվել է ԱՄՆ պաշտպանության նախարար Օսթին Լլոյդի, ԱՄՆ Զինված ուժերի Շտաբների պետերի կոմիտեի նախագահ Մարկ Միլիի եւ ԱՄՆ ԶՈւ Կենտրոնական հրամանատարության հրամանատար, գեներալ Մայքլ Քուրիլայի Իսրայել կատարած այցի ժամանակ։
