Ռուսաստանի հինգ շրջաններում ընդդիմադիր քաղաղաքական գործիչները ենթարկվում են խուզարկությունների։ Այս մասին մայիսի 18-ի առավոտյան տեղեկացրել են ռուսալեզու մի քանի Թոելեգրամ-ալիքներ։
Ինչպես գրել է «ՕՎԴ-Ինֆո» Թելեգրամ-ալիքը, Մոսկվայում ուժայինները եկել են ՌԴ Պետդումայի պատգամավորի նախկին թեկնածու, ՄՊՀ դոցենտ Միխայիլ Լոբանովի մոտ։ «Նա գրել է, որ իր դուռը կոտրում են, իսկ հետո կապը նրա հետ ընդհատվել է»,- նշել են իրավապաշտպանները։ Նրանք Լոբանովի մոտ են ուղարկել փաստաբան Տատյանա Օկուշկոյին։
«112» Թելեգրամ-ալիքը հրապարակել է տեսագրություն, որտեղ պատկերված է, թե ինչպես են ուժայինները դիմակներով կոտրում Լոբանովի բնակարանի դուռը՝ «պառկե՛ք հատակին» խոսքերով։
Որոշ Թելեգրամ-ալիքներ տարածել են տեղեկություն, որի համաձայն՝ խուզարկությունները կապված են այն բանի հետ, որ Լոբանովն իբր մասնակցել է «Ժողովրդական պատգամավորների համագումարին» եւ մեկ այլ քաղաքական ընդդիմադրի՝ Իլյա Պոնոմարյովի կողմնակիցն է։ Այնինչ, «Միխայիլ Լոբանով» Թելեգրամ-ալիքում հայտարարություն է տեղադրվել, որում ընդգծվել է, որ քաղաքական գործիչը ծանոթ չէ եւ որեւէ կապ չունի «Ժողովրդական պատգամավորների համագումարի» կազմակերպիչ Իլյա Պոնոմարյովի հետ։
«Միխայիլին հետապնդում են իր քաղաքական գործունեության եւ բացահայտ դիրքորոշման համար։ Իլյա Պոնոմարյովի եւ որեւէ նախագծի հետ նա ոչ մի կապ չունի»,- նշել են Լոբանովի համախոհները։ Իլյա Պոնոմարյովն ինքը SOTA Թելեգրամ-ալիքում տեղեկացրել է, որ ծանոթ չէ Լոբանովի հետ։
«112» Թելեգրամ-ալիքի տեղեկություններով՝ խուզարկություններ են կատարվել նաեւ «Յաբլոկո» կուսակցության անդամներ Գալինա Ֆիլչենկոյի (Կեմերովոյի մարզ) եւ Նոդարի Խանանաշվիլու (Մոսկվա) մոտ։ «Կոմերսանտը», հղում կատարելով RT-ին, գրել է, որ ուժայինները եկել են Պետերբուրգի ցանցային «Ладога.ру» պարբերականի գլխավոր խմբագիր Ալեքսանդր Կալինինի մոտ։