Որպեսզի Բաքվի հետ ինչ-որ բանակցություններ լինեն, հարցը պետք է դուրս բերվի այն կոնտեքստից, որը Ադրբեջանը փորձում է ներկայացնել, որ դա իրենց ներքին հարցն է։ Այս մասին մայիսի 18-ին կայացած մամուլի ասուլիսում ասաց «Արցախի անվտանգության եւ զարգացման ճակատի» համակարգող, Արցախի նախկին պետնախարար Ռուբեն Վարդանյանը։
Ըստ նրա՝ պետք է հատուկ միջազգային ինստիտուտ ստեղծվի, որը պետք է ապահովի, որ տարբեր տեսակետներ ներկայացնող երկու կողմերը կարողանան բանակցել։
«Դրա համար ընտրվում են միջազգային միջնորդներ։ Երկու կողմերն էլ պետք է համաձայնեն, որ բանակցություններ կլինեն։ Առայժմ կողմերից մեկը հերքում է բանակցությունների հարցը եւ պնդում, որ դա իրենց ներքին գործն է եւ չի կատարում միջազգային մարմինների որոշ որոշումներ։ Այս առումով նրանց կողմից խախտումներն ակնհայտ են․ դա եւ՛ Միջազգային դատարանի որոշման չկատարումն է, եւ՛ 2020 թվականի նոյեմբերի 9-ի հայտարարության չկատարումը։ Կարեւոր է, որ բոլոր կողմերը համաձայնեն կատարել այն, ինչի մասին պայմանավորվում են»,-հավելեց Վարդանյանը։
