Գերմանական Volkswagen ավտոարտադրողը ռուսական «Ավիլոն» դիլերին է վաճառել իր բոլոր ակտիվները Ռուսաստանում, նշվել է ընկերության հաղորդագրությունում։ Գործարքն ընդգրկել է Կալուգայի արտադրական հզորությունները եւ գերմանական ընկերության մեկ այլ բիզնես։
Նշվել է, որ ավարտվել է Volkswagen Group-ի բաժնեմասի վաճառքը «Ֆոլքսվագեն Գրուփ Ռուս» ՍՊԸ-ին, ներառյալ «Արտ-Ֆինանս» ՍՊԸ-ի դուստր ընկերությունները («Ֆոլքսվագեն Կոմպոնենտի եւ Ուսլուգի» ՍՊԸ-ն, «Սկանիա Լիզինգ ՍՊԸ-ն, «Ֆինանս Սկանիա» ՍՊԸ-ն, «Ստրախովանիե Սկանիա» ՍՊԸ-ն)։ «Գործարքի գրանցմամբ սեփականության իրավունքը՝ «Ֆոլքսվագեն Գրուփ Ռուս» ՍՊԸ-ի եւ նրա դուստր ձեռնարկությունների կանոնադրական կապիտալով հանդերձ, վաճառողներից անցնում է գնորդին»,- նշել են գերմանական ընկերությունում։
«Ինտերֆաքսի» աղբյուրի տվյալներով՝ Ռուսաստանի իշխանությունները թույլ են տվել «Ավիլոն»-ին գնել Volkswagen-ի ակտիվները 125 մլն եվրոյով։
Volkswagen-ը դադարեցրել է մեքենաների հավաքումը Ռուսաստանում եւ մատակարարումները երկիր 2022թ. մարտին, Ուկրաինայում ռազմական գործողության սկսվելուց հետո։ Անցած աշնանը գերմանական կոնցեռնը մտադիր էր մեկ տարվա ընթացքում վաճառել իր ռուսական ակտիվները Porsche-ին, Scania-ին եւ MAN-ին։