Ադրբեջանում ավարտվել է 30 տարի առաջ սպանություն կատարելու մեջ մեղադրվող Նազիմ Բայրամովի գործով նախաքննությունը:
Ինչպես հայտնում է haqqin.az-ը, քրեական գործով նյութերն ուղարկվել են դատարան: Ձեռք բերված ապացույցների համաձայն՝ 1993 թվականի նոյեմբերի 26-ին Նազիմ Բայրամովն այցելել է իր գործընկեր Ֆիքրեթ Իբրահիմովի տուն։ Այցն ավարտվել է վիճաբանությամբ, որի ժամանակ Բայրամովը՝ խլելով ատրճանակը, կրակել է Իբրահիմովի գլխին եւ դիմել փախուստի:
2022 թվականի հոկտեմբերի 28-ին Նազիմ Բայրամովին մեղադրանք է առաջադրվել քրեական օրենսգրքի 94-րդ հոդվածի 2-րդ մասով (ծանրացուցիչ հանգամանքներում դիտավորյալ սպանություն) եւ ներկայումս գործող քրեական օրենսգրքի 228.1-րդ հոդվածով (հրազեն, դրա բաղկացուցիչ մասեր, ռազմամթերք, պայթուցիկ նյութեր եւ սարքեր ապօրինի պահելը, ձեռք բերելը, հանձնելը, վաճառելը, փոխադրելը)։
Նշվում է, որ Բայրամովը պատերազմի վետերան է եւ հանրության շրջանում հայտնի է եղել որպես ռազմական փորձագետ:
