Հոլանդական սպառողների Consumentenbond ասոցիացիան և Stichting Bescherming Privacybelangen հիմնադրամը Google-ի դեմ գաղտնիության խախտման հսկայածավալ դատական հայց են պատրաստում, հայտնում է NL Times-ը:
Օգտատերերը պահանջում են, որ Google-ը դադարեցնի հետևել, հավաքել և վաճառել տվյալներ՝ առանց իրենց համաձայնության: Նրանք նաև պահանջում են փոխհատուցում՝ Նիդեռլանդներում գտնվող ընկերության բոլոր օգտագործողների համար։ Եթե ընկերությունը չկարողանա դա անել, ասոցիացիան մտադիր է դատական հայց ներկայացնել:
«Google-ը տվյալների մշակման աշխարհում գերիշխող ընկերությունն է: Այն հավաքում և մշակում է հսկայական քանակությամբ անձնական տվյալներ իր ապրանքների և ծառայությունների միջոցով.. .Google-ը տեղեկատվություն է հավաքում այնպես, որ օգտատերերի համար հնարավոր չէ իրական համաձայնություն տալ դրան»,- հայտնել են Consumentenbond-ից:
Ըստ ասոցիացիայի՝ Google-ը հավաքագրված տվյալները կիսում է այլ կողմերի հետ, այդ թվում՝ Եվրոպայից դուրս, ինչը հակասում է գաղտնիության պահպանման եվրոպական օրենքներին և «հոլանդացի սպառողներին ենթարկում օտարերկրյա իշխանությունների կողմից հսկողության վտանգի»:
«Ըստ օրենքի՝ դրա համար սպառողները պետք է ֆինանսական փոխհատուցում ստանան։ Սա միակ միջոցն է այս ընկերություններին հասկացնելու, որ նրանք պետք է պահպանեն կանոնները», - ասում է Consumentenbond-ի տնօրեն Սանդրա Մոլենարը: