ԱՄՆ-ն բավականին շահագրգռված է մեր տարածաշրջանում խաղաղության հաստատմամբ: Այս մասին այսօր՝ մայիսի 25-ին, ԱԺ-ում լրագրողների հետ զրույցում ասաց ՔՊ-ական պատգամավոր Արթուր Հովհաննիսյանը:
«Մենք շատ ինտենսիվ համագործակցում ենք մեր գործընկերների հետ: ՀՀ պատմության մեջ երբեք նման ինտենսիվ համագործակցություն չի եղել ԱՄՆ-ի հետ: Այս իմաստով մենք ընդունում ենք մեր ցանկացած գործընկեր պետության աջակցությունը նաեւ հարթակ տրամադրելու առումով Ադրբեջանի հետ բանակցություններում: Բայց թե ինչ ինչ կետերի վերաբերյալ եւ ինչ բովանդակությամբ են խոսակցությունները տեղի ունենում բանակցություններում, դրանց բացհայտումը վնասելու է բանակցային հետագա գործընթացին, դրա համար չեմ կարող դրանց անդրադառնալ»,-ասաց նա:
Նա ընդգծեց, որ ՀՀ-ն ամեն ինչ անում է, որպեսզի հնարավորիս շուտ կարողանանք ստորագրել խաղաղության պայմանագիրը. «Բայց շուտը հարաբերական է, որովհետեւ պետք է ռիսկերը հաշվի առնենք, նաեւ Ադրբեջանի կառուցողականությունն ակնկալենք մեր միջազգային գործընկերների ճնշման տակ, որ կարողանանք առաջ շարժվել: Մենք պատրաստակամ ենք, բայց հնարավորությունների մասով ոչինչ ասել չեմ կարող»,-ասաց ՔՊ-ական պատգամավորը: