Դեպի ՌԴ ծովային փոխադրումները ժամանակային առումով ավելի երկար չեն լինի, քան Վերին Լարսի ավտոմոբիլային ճանապարհով։ Այս մասին այսօր՝ մայիսի 30-ին, ԱԺ մշտական հանձնաժողովների համատեղ նիստում 2022 թվականի պետական բյուջեի կատարողականի հաշվետվության քննարկման ժամանակ ասաց էկոնոմիկայի նախարար Վահան Քերոբյանը։

Ընդ որում, ինչպես նշեց Քերոբյանը, արժեքը կարող է ավելի ցածր լինել։

«Բաթումի-Նովոռոսիյսկ երթուղով կոնտեյներատար նավն արդեն գործարկվել է եւ Վերին Լարսին իրական այլընտրանք է դարձել»,-նշեց նա։

Նրա խոսքով՝ «S&M Logistics» ընկերության կողմից կառավարվող կոնտեյներատար նավն արդեն երկու փորձնական չվերթ է իրականացրել։

«Նոր երթուղին ունի նաեւ ծավալների առավելություն։ Որքան մեծ է փոխադրման ծավալը, այնքան ցածր է փոխադրվող բեռի միավորի գինը։ Այնպես որ, այդ երթուղին շահավետ է նաեւ գնային առումոով»,-նկատեց նախարարը։

Ի վերջո, այդ փոխադրումները՝ ի տարբերություն սողանքների եւ ձյան տեղումների պատճառով տարեկան մի քանի անգամ փակվող Վերին Լարսի լեռնանցքով փոխադրումների, գրեթե կախված չեն եղանակային պայմաններից:

«Դա թույլ է տալիս ավելի հեշտ պլանավորել փոխադրումները»,-ընդգծեց Քերոբյանը։

Բացի այդ, «Ռուսական երկաթուղիներ»-ը եւ Հայաստանում նրա դուստր ընկերությունը՝ «Հարավկովկասյան երկաթուղին», մի քանի տարի առաջ զեղչեր էին հայտարարել Հայաստանի եւ Ռուսաստանի միջեւ երկու ուղղություններով փոխադրվող բեռների համար։ Խնայողությունները հատկապես նշանակալի էին երկար հեռավորությունների ժամանակ։