Գյումրիի «Շիրակ» օդանավակայանի զարգացմամբ երկուշաբթի կզբաղվի աշխատանքային խումբը՝ փոխվարչապետներից մեկի գլխավորությամբ ։ Այս մասին այսօր՝ մայիսի 30-ին, ԱԺ մշտական հանձնաժողովների համատեղ նիստում 2022 թվականի պետական բյուջեի կատարողականի հաշվետվության քննարկման ժամանակ նշեց ՀՀ տարածքային կառավարման եւ ենթակառուցվածքների նախարար Գնել Սանոսյանը։
2021 թվականին, հիշեցրեց նա, օդանավակայանի թռիչքուղին վերանորոգվել է։ Այն չի համապատասխանել միջազգային չափանիշներին։ Վերանորոգվել է նաեւ տերմինալի մի մասը։
«Այժմ փոխվարչապետի գլխավորությամբ ստեղծել ենք աշխատանքային խումբ՝ օդանավակայանների զարգացման հարցերով»,-նշեց նա։
Հայաստանի օդանավակայանների կոնցեսիոներ «Արմենիա միջազգային օդանավակայաններ» ընկերության հետ բանակցություններ են ընթանում օդանավակայանների օպտիմալ շահագործման եւ ավիափոխադրողների ներգրավման շուրջ:
Նրա խոսքով՝ Երեւանի «Զվարթնոց» միջազգային օդանավակայանն աշխատում է իր հզորության գագաթնակետին մոտ։ «Շիրակը» շաբաթական ընդամենը մի քանի չվերթ է սպասարկում։
