Մենք ողջունում ենք ԵՄ ներկայությունը տարածաշրջանում եւ մեր աջակցությունն ենք հայտնում ԵՄ քաղաքացիական առաքելությանը։ Այս մասին մայիսի 30-ին Հայաստանի խորհրդարանի նախագահ Ալեն Սիմոնյանի հետ համատեղ ճեպազրույցում ասել է Սլովենիայի Ազգային ժողովի նախագահ Ուրշկա Կլակոչար Զուպանչիչը։
Նրա խոսքով, այն նպատակ ունի երկու կողմերի միջեւ վստահության մթնոլորտ ստեղծել։ «Մենք հետեւում ենք Լեռնային Ղարաբաղում իրավիճակին»,- ընդգծել է նա։
Պատգամավորը նշել է, որ իրեն հուզել է Հայոց ցեղասպանության թանգարան-ինստիտուտ այցելությունը։
«Մենք կարեւոր ենք համարում Հայաստանի հետ հարաբերությունների զարգացումը, այդ թվում՝ խորհրդարանական բարեկամական խմբերի մակարդակով»,- հավելել է նա։
Նշենք, որ ԵՄ դիտորդների քաղաքացիական առաքելությունը տեղակայված է Ադրբեջանի հետ սահմանի հայկական կողմում։