ՀՀ հակակոռուպցիոն դատարանը մերժել է «Ցորի» զորամասի զոհված զինծառայողների ծնողների ներկայացուցիչ, փաստաբան Լիպարիտ Սիմոնյանի՝ դատախազության անգործության հիմքով բողոքը։ Այս մասին NEWS.am-ը տեղեկացավ Լիպարիտ Սիմոնյանից:
Դատարանը մերժել է նաեւ գործը Մովսես Հակոբյանի վերաբերյալ քրեական գործից առանձնացնելու մասին միջնորդությունը։
Նա նշեց, որ պատրաստվում են դատարանի որոշման դեմ բողոք ներկայացնել:
«Դատախազությունը պետք է նախկին քրեական դատավարության օրենսգրքի երկու հոդվածներով նախատեսված որոշումներից մեկը կայացներ, սակայն գրությամբ այն ուղարկել է Մովսես Հակոբյանին վերաբերող քրեական գործին կցելու ու համատեղ քննություն կատարելու։ Այդ երկու գործերն բոլորովին տարբեր են, նույն թեմային չեն վերաբերվում»,- նշեց Լիպարիտ Սիմոնյանը:
Հիշեցնենք, որ «Ցորի» զորամասի զոհված զինծառայողների ծնողները հանցագործության մասին հաղորդում էին ներկայացրել՝ վարչապետ Նիկոլ Փաշինյանի դեմ այն բանից հետո, երբ Փաշինյանը հայտարարեց. «Այո, կարող էինք կանխել պատերազմը, եւ կունենայինք նույն վիճակը, բայց առանց զոհերի»։ Ծնողների հաղորդումը կցվել է ԳՇ նախկին պետ Մովսես Հակոբյանի վերաբերյալ քրեական գործին։
