Ուկրաինայի նախագահ Վլադիմիր Զելենսկին հինգշաբթի Մոլդովա կատարած ուղեւորության ժամանակ հայտարարել է, որ իր երկիրը պատրաստ է անդամակցել ՆԱՏՕ-ին, եւ որ Կիեւը սպասում է, թե երբ դաշինքը պատրաստ կլինի ընդունել իր երկրին, տեղեկացրել է Reuters-ը։
Նա նաեւ հաստատել է Ուկրաինայի ցանկությունը Եվրամիություն մտնելու մասին։
«Մենք աջակցում ենք Մոլդովային եւ նրա ժողովրդին, որոնք ինտեգրվում են ԵՄ-ին։ Դուք աջակցել եք մեր ժողովրդին, մեր փախստականներին, որոնք փախել են պատերազմի առաջին օրերին, եւ մենք երբեք դա չենք մոռանա»,- ասել է Զելենսկին՝ կանգնելով Մոլդովայի նախագահ Մայա Սանդուի կողքին։
«Մեր ապագան ԵՄ-ում է։ Ուկրաինան պատրաստ է անդամակցել ՆԱՏՕ-ին»,- ավելացրել է նա։
Եվրոպական քաղաքական հանրույթի գագաթաժողովը տեղի է ունենում Մոլդովայում, Ուկրաինայի տարածքից մոտ 20 կիլոմետր հեռու գտնվող ամրոցում։
