Բելառուսի նախագահ Ալեքսանդր Լուկաշենկոն հունիսի 1-ին հանդիպել է ԱՊՀ մասնակից պետությունների անվտանգության մարմինների եւ հատուկ ծառայությունների ղեկավարների խորհրդի 52-րդ նիստի մասնակիցների հետ, տեղեկացրել է ԲԵԼՏԱ-ն։
«Ես առաջին անգամ չէ, որ հանդիպում եմ մասնագետների, ղեկավարների (թե՛ ՀԱՊԿ, թե՛ ԵԱՏՄ եւ այլն) հետ, միշտ, բնականաբար, ցանկացած միջոցառման նախօրեին մտածում ես գլխավորի մասին։ Չէ՞ որ գլխավորն այն է, որ ԱՊՀ բոլոր անդամները լուրջ են ընկալում մեր խորհուրդը։ Եվ այն, որ անվտանգության մարմինների բոլոր ղեկավարները եկել են Բելառուս, վկայում է այն մասին, որ դուք տեսնում եք, թե ինչ է կատարվում մեր սահմանների շուրջ, մեր Համագործակցության, եւ դուք հասկանում եք, թե ինչ կարող է լինել»,- ասել է Բելառուսի նախագահը։
Նա նշել է, որ քաղաքական գործիչները եւ տնտեսագետները ԱՊՀ երկրներում կարող էին երբեմն տարբեր մոտեցումներ ունենալ, բայց հատուկ ծառայությունները միշտ սերտ կապի մեջ են եղել։ «Այս ուղղությամբ պետք է գործել նաեւ այժմ»,- համոզված է նա։
«Այն բանից հետո, ինչ սկսվեց հատուկ ռազմական գործողությունն Ուկրաինայում եւ Բելառուսի ու Ռուսաստանի դեմ սկսեցին մասշտաբային պատժամիջոցներ մտցնել, մեր երկրներում ոմանք սկսեցին տատանվել, սասանվել, տարակուսել եւ այլն։ Դա, երեւի, բնական է։ Շատ բուռն իրադարձություններ տեղի ունեցան ակնթարթորեն, ուստի որոշ ժամանակ է պետք, որպեսզի գնահատվի իրավիճակը,- ասել է Ալեքսանդր Լուկաշենկոն։- Բայց հատուկ ծառայությունները միշտ կապի մեջ են եղել։ Նրանք գործում են հանգիստ, կամաց, աննկատ, ինչպես եւ վայել է հատուկ ծառայություններին։ Արեւմուտքն այդ շփումների մասին շատ բան չգիտի, ուստի այնքան էլ չի վախենում եւ քիչ պահանջներ է ներկայացնում ձեզ՝ մեր դաշնակիցներին։ Դե, իսկ մենք Ռուսաստանի հետ միասին հայտնվեցինք այդ բուռն իրադարձությունների էպիկենտրոնում»։
Հիշեցնենք, որ Բելառուսում ԱՊՀ երկրների հատուկ ծառայությունների ղեկավարների նիստին մասնակցում է նաեւ Հայաստանի ԱԱԾ տնօրեն Արմեն Աբազյանը։
