«Գործուն զղջման» հիմքով քրեական պատասխանատվությունից ազատելը չենք կարող մեկնաբանել, քանի որ դա քննչական կոմիտեի լիազորություններից դուրս է: Այս մասին այսօր՝ հունիսի 2-ին, ԱԺ մշտական հանձնաժողովների համատեղ նիստում 2022 թվականի պետական բյուջեի կատարողականի մասին հաշվետվության քննարկման ժամանակ ասաց ՔԿ նախագահ Արգիշտի Քյարամյանը՝ մեկնաբանելով Դիլիջանում անչափահասին ծեծելու գործով իրավապահ մարմինների ներկայացուցիչների գործողությունները։
«Այնուամենայնիվ, որպեսզի հասկանալի լինի, ես կցանկանայի ներկայացնել ՔԿ-ի դիրքորոշումը, ինչպես նաեւ անձամբ իմ դիրքորոշումը նման երեւույթների վերաբերյալ։ Միջնորդությունը ներկայացրել է մարզային քննիչը։ Կայացված որոշումը քննչական կոմիտեի տիրույթից դուրս է, եւ մենք չենք ընդունում եւ չենք համարում, որ այս նորմը կիրառելի է անչափահասների դեմ ոտնձգություն կատարած անձանց նկատմամբ»,-ասաց Քյարամյանը ։
Ընդ որում, նրա խոսքով, օրենքը թույլ է տալիս կիրառել «գործուն զղջման» նորմը այն անձանց նկատմամբ, որոնք առաջին անգամ ոչ ծանր հանցագործություն են կատարել:
«Բայց այս դեպքում որոշումը չի համապատասխանում ՔԿ դիրքորոշմանը։ Ես գիտեմ, որ հասարակության մեջ այս երեւույթը բացասական արձագանք գտավ։ Եվ այս առումով ես պատրաստ եմ ներողություն խնդրել հասարակության այն շերտերից, որոնք գուցե հիասթափվել են իրավապահ համակարգի աշխատանքից»,-ասաց Քյարամյանը։
Նա ուշադրություն հրավիրեց այն հանգամանքին, որ գլխավոր դատախազությունը կիսում է իր մոտեցումը, եւ որ նախաքննությունը շարունակվում է։
