Ուկրաինան Ռուսաստանին մեղադրել է հակահարձակման մասին ապատեղեկատվություն տարածելու մեջ այն բանից հետո, երբ Մոսկվան երկուշաբթի առավոտյան հայտարարել էր Դոնեցկի մարզի հինգ ճակատային կետերում «ուկրաինական խոշոր հարձակման» խափանման մասին:
ՌԴ ՊՆ-ն հայտարարել էր, որ կիրակի Ուկրաինան 6 մեքենայացված եւ երկու տանկային գումարտակներով հարձակում է սկսել Դոնեցկի մարզի հարավի ուղղությամբ։
«Հակառակորդի նպատակն էր ճեղքել մեր պաշտպանությունը ռազմաճակատի, իր կարծիքով, ամենախոցելի հատվածում», - ասվում է ՌԴ պաշտպանության նախարարության հայտարարության մեջ։ «Թշնամին չի հասել իր նպատակներին»։
Ուկրաինայի ցամաքային զորքերի հրամանատար Ալեքսանդր Սիրսկին երկուշաբթի հայտարարել է, որ ուկրաինական ուժերը շարունակում են «առաջ շարժվել» Դոնեցկի հյուսիսում գտնվող Բախմուտի շրջանում։ Սիրսկին չի հիշատակել Կիեւի վաղուց ծրագրված հակահարձակման մասին։
Ռազմավարական հաղորդակցությունների ուկրաինական կենտրոնը ուղղակիրոեն չի պատասխանել Ռուսաստանի հայտարարությանը՝ հավելելով, որ Ռուսաստանը կեղծ տեղեկատվություն է տարածում։
«Ուկրաինացիներին բարոյալքելու եւ հանրությանը (ներառյալ սեփական բնակչությանը) մոլորեցնելու նպատակով ռուս քարոզիչները կեղծ տեղեկություններ են տարածում հակահարձակման, դրա ուղղությունների եւ ուկրաինական բանակի կորուստների մասին»,- ասվում է զեկույցում։
Ռուս ռազմական բլոգերները հայտնել են ճակատի երկայնքով մի քանի կետերում մարտերի մասին, հատկապես Ուգլեդարի շրջանում՝ Բախմուտից մոտ 150 կմ հարավ-արեւմուտք:
