Ուկրաինան ամերիկյան իշխանություններին չի տեղեկացրել հակահարձակման ստույգ օրվա մասին, բայց Վաշինգտոնը կարծում է, որ այն արդեն սկսվել է։ Այս մասին գրել է The New York Times թերթը՝ հղում կատարելով ամերիկյան պաշտոնատար անձանց։

Թերթի տվյալներով՝ Կիեւն ամերիկյան իշխանություններին ներկայացրել է միայն ժամանակային շրջանակները, թե երբ են Ուկրաինայի Զինված ուժերը նախատեսում սկսել հակահարձակումը։ Ինչպես նշել է պարբերականը, կիրակին մտնում է այդ ժամանակային շրջանակի մեջ։

Ամերիկյան ռազմական արբանյակները գրանցել են զինծառայողների ակտիվացում ուկրաինական դիրքերում։ Ամերիկյան պաշտոնյաների խոսքով՝ Ուկրաինայի Զինված ուժերն սկսել են գործողություններ, որպեսզի պարզեն ռուսական զորքերի դիրքերն ու թվաքանակը, «մարտով հետախուզությունը» կշարունակվի մի քանի օր։

Ուկրաինայի պաշտպանության փոխնախարար Աննա Մալյարը երկուշաբթի ասել է, որ Կիեւն անցնում է հարձակողական գործողությունների «որոշ ուղղություններով»։ Ընդ որում՝ նրա խոսքով, «մարտական գործողությունների էպիկենտրոնը մնում է Բախմուտի ուղղությունը»։