Կախովկայի ՀԷԿ-ում Կիեւի դիվերսիան կապված է ուկրաինական զորքերի հարձակման ընթացքում հաջողությունների բացակայության հետ։ Այս մասին հայտարարել է ՌԴ նախագահի խոսնակ Դմիտրի Պեսկովը, հաղորդում է «ՌԻԱ Նովոստին»։
«Այս ամենից դատելով՝ կարելի է ասել, որ այս դիվերսիան կապված է երկու օր առաջ սկսված լայնածավալ հարձակողական գործողությունների հետ։ Այժմ ուկրաինական զինված ուժերը չեն կարողանում հասնել իրենց նպատակներին»,-ասել է նա։
Կախովկայի ՀԷԿ-ի վերին մասը ավերվել է անցած գիշեր տեղի ունեցած գնդակոծությունների արդյունքում, ջրամբարի ամբարտակը չի փլուզվել։ Ուկրաինական զորքերի հարվածը ՀԷԿ-ին, ենթադրաբար, հասցվել է «Օլխա» ՀԿՌՀ-ից։ Ընթանում է ջրի չկարգավորված արտահոսք։ Ափամերձ մի շարք բնակավայրերում սկսվել է բնակչության տարհանում։ Նովոկախովսկի քաղաքային օկրուգի վարչակազմի ղեկավար Վլադիմիր Լեոնտեւը հարձակման համար պատասխանատու է համարում Կիեւին։
