Թուրքիայի նախագահի երդմնակալության արարողության ժամանակ հատուկ էր ընտրվել, որ Նիկոլ Փաշինյանը պետք է նստի Իլհամ Ալիեւի հետեւում, որպեսզի ընդգծվեր Թուրքիայի վերաբերմունքը տարածաշրջանի իրադարձություններին։ Այս մասին NEWS.am-ի հետ զրույցում նշեց «Միացյալ Հայաստան» կուսակցության հիմնադիր նախագահ Երվանդ Թարվերդյանը։
«Նիկոլ Փաշինյանի մասնակցությունը Թուրքիայի նախագահի երդմնակալության արարողությանը այդ երկրի հետ հարաբերությունների կարգավորման տրամաբանության մեջ է, ինչն առաջ է տանում այս իշխանությունը։ Եթե ես ղեկավարեի պետությունը, չէի մասնակցի այդ արարողությանը, կմասնակցեին համապատասխան պաշտոնատար անձինք, բայց ոչ ես։ Ինչ վերաբերում է լուսանկարներին եւ տեսանյութերին, ինձ համար հաճելի չէր Հայաստանի ղեկավարին այդ վիճակում տեսնելը։ Թուրքիայի նախագահի երդմնակալության արարողության ժամանակ հատուկ էր ընտրվել, որ Նիկոլ Փաշինյանը պետք է նստի Իլհամ Ալիեւի հետեւում, որպեսզի ընդգծվեր Թուրքիայի վերաբերմունքը տարածաշրջանի իրադարձություններին։ Դա տրամաբանական է, որովհետեւ թուրք-ադրբեջանական տանդեմը փորձում է դառնալ առաջատարը տարածաշրջանում։ Արարողակարգային այս քայլերը պատահականություն չեն, որովհետեւ դիվանագիտական լեզուն օգտագործում է յուրաքանչյուր ժեստ»,- ասաց նա։
