Հայ-ադրբեջանական կոնֆլիկտի հանգուցալուծումը պետք է լինի Մոսկվայում, որովհետեւ 44-օրյա պատերազմը կանգնեցրել է Մոսկվան։ Այս մասին NEWS.am-ի հետ զրույցում նշեց «Միացյալ Հայաստան» կուսակցության հիմնադիր նախագահ Երվանդ Թարվերդյանը։
«Եթե այսքանից հետո իշխանությունը վարում է արեւմտամետ քաղաքականություն, հակատրամաբնական է։ Իշխանությունը փակուղի է մտցրել արտաքին քաղաքականությունը, ձախողել է այն։ Մեր արտաքին վեկտորը սպասարկող պաշտոնյաներն իրենք էլ չգիտեն՝ ինչ են ուզում, մի օր Վաշինգտոնում են, մի օր՝ Պրահայում, հետո՝ Քիշնեւ, Մոսկվա»,- ասաց նա։
Երվանդ Թարվերդյանը կարծում է՝ այսօր Արցախը եւ արցախահայությունը գոյություն ունի Ռուսաստանի Դաշնության շնորհիվ։
«Մենք ազգովի պետք է շնորհակալ լինենք Ռուսաստանին, որ մենք այսօր ունենք Արցախ եւ արցախահայություն, հակառակ դեպքում այս իշխանությունը պատերազմով հանձնելու էր ամբողջ Արցախը։ Իմ կարծիքով՝ Ռուսաստանը պատերազմը կանգնեցնելիս անգամ չի էլ հարցրել Հայաստանի իշխանությանը։ Հարկ եղած ժամանակ Ռուսաստանի դեսպանը, համապատասխան պաշտոնյաները հայտարարում են, որ Հայաստանը, շեշտեմ՝ ոչ թե իշխանությունը, Ռուսաստանի բարեկամն է, եւ չեն պատրաստվում այստեղից հեռանալ։ Հայաստանում բարձրաստիճան պաշտոնյաների ահռելի զանգված տարիներ շարունակ սպասարկվել է Սորոսի կողմից, եւ այսօր էլ ծառայում է արմեւատեմտ գրասենյակներին, տառապում ռուսաֆոբիայով, եւ չեն գիտակցում այսօր մեր պետության առջեւ ծառացած մարտահրավերները»,- ընդգծեց Թարվերդյանը։
