CGT ձախ արմատական արհմիության ակտիվիստների մի փոքր խումբ երեքշաբթի ներխուժել է Փարիզի Սեն Դենի արվարձանում գտնվող 2024 թվականի Օլիմպիական խաղերի կենտրոնակայան՝ հակամակրոնական կարգախոսներ վանկարկելով, հայտնում է The Associated Press-ը:

Այդ օրը ֆրանսիական արհմիությունների ներկայացուցիչները երթով շարժվել են դեպի Օլիմպիական խաղերի  կենտրոնակայան եւ կաթվածահար են արել երթեւեկությունը մայրաքաղաքի Օրլի օդանավակայանում՝ փորձելով վերականգնել կենսաթոշակային տարիքի բարձրացման դիմադրությունը:

Բայց այս վերջին ջանքերը ավելի քիչ կողմնակիցների է գրավել, քան այս տարվա սկզբին շարժման գագաթնակետին, եւ նույնիսկ որոշ արհմիության ղեկավարներ, կարծես, պատրաստ են առաջ շարժվել:

Երեքշաբթի օրը Փարիզի Օրլի օդանավակայանում թռիչքների մեկ երրորդը չեղարկվել է գործադուլների պատճառով, իսկ Ֆրանսիայի ողջ տարածքում գնացքների մոտ 10 տոկոսը դադարեցվել է: Շուրջ 250 երթեր, հանրահավաքներ եւ այլ ակցիաներ են նախատեսված ամբողջ երկրում:

Երկրի արեւմուտքում գտնվող Ռեն քաղաքում արհմիության ակտիվիստները երթով անցել են երկաթուղային ճանապարհով, սակայն հետ են մղվել ոստիկանության կողմից։

Փարիզում հազարավոր մարդիկ հավաքվել են Սենա գետի ափին ՝ հաշմանդամություն ունեցող անձանց ոսկե հուշարձանի մոտ՝ նախքան երթով շարժվելը դեպի Փարիզի հարավ-արեւելք: Խաղաղ ամբոխը ծածանել է արհմիության դրոշները,  հարվածային գործիքներ նվագել եւ վանկարկել՝ պահանջելով չեղյալ հայտարարել կենսաթոշակային օրենքը եւ նվազեցնել կենսաթոշակային տարիքը:

Երեքշաբթի օրը բողոքի ակցիաների կազմակերպիչները հույս ունեն աջակցություն ստանալ հնարավոր խորհրդարանական բանավեճից առաջ օրինագծի շուրջ, որն ուղղված է կենսաթոշակային նոր տարիքի չեղարկմանը:

Երկրի նախագահ Էմանուել Մակրոնի՝ կենսաթոշակային տարիքը 62-ից 64-ի բարձրացնելու եւ այդ միջոցն առանց քվեարկության խորհրդարանի միջոցով անցկացնելու որոշումը բուռն արձագանք է առաջացրել հասարակության շրջանում եւ հրահրել վերջին տարիների ընթացքում Ֆրանսիայում ամենախոշոր ցույցերը: Սակայն կենսաթոշակային բարեփոխումների շուրջ զայրույթի ուժգնությունը նվազել է մայիսի 1-ին տեղի ունեցած վերջին խոշոր բողոքի ակցիաներից եւ ապրիլին համապատասխան օրենքի ընդունումից հետո։