Շվեդիայի պաշտպանության նախարար Փոլ Յունսոնը երեքշաբթի ասել է, որ իր երկրի գլխավոր առաջնահերթությունը ՆԱՏՕ-ին լիիրավ անդամակցությունն է՝ նախքան դաշնակից երկրների ղեկավարների հաջորդ գագաթնաժողովը Վիլնյուսում, հաղորդում է Associated Press-ը:

Յունսոնը հավելել է, որ հարգում է Թուրքիայի և Հունգարիայի որոշումները, և որ Շվեդիան ունի հակաահաբեկչական նոր օրենսդրություն, որը «կփակի այնտեղ մնացած բոլոր բացերը՝ Թուրքիայի մտահոգությունները լուծելու համար»:

ՆԱՏՕ-ն ցանկանում է, որ Շվեդիան միանա իր շարքերը մինչև ԱՄՆ նախագահ Ջո Բայդենը և դաշնակից մյուս առաջնորդները հուլիսի 11-12-ը հանդիպեն Վիլնյուսում, սակայն Թուրքիան և Հունգարիան դեռ չեն հաստատել այդ քայլը: Դաշինքին միանալու համար անդամ բոլոր 31 երկրները պետք է վավերացնեն թեկնածուի անդամակցության արձանագրությունը։