Պետքարտուղար Էնթոնի Բլինկենը ծրագրում է առաջիկա շաբաթներին այցելել Չինաստան՝ բանակցություններ վարելու բարձրաստիճան պաշտոնյաների, հնարավոր է նաև նախագահ Սի Ցզինպինի հետ, հաղորդում է Bloomberg-ը՝ վկայակոչելով խնդրին ծանոթ մարդկանց:
Լրատվամիջոցը նշում է, որ ԱՄՆ-ը ձգտում է վերսկսել հաղորդակցությունը բարձր մակարդակով՝ չնայած շարունակվող լարվածությանը։
Բլինկենի այցի ստույգ ժամանակը դեռ որոշված չէ, հայտնել են աղբյուրները։
Պետդեպարտամենտի ներկայացուցիչն ասել է, որ գործակալությունը մտադիր չէ հայտարարել ուղևորության մասին, և որ Բլինկենի՝ նախկինում հետաձգված այցը տեղի կունենա, երբ պայմանները թույլ տան:
Եթե այցը տեղի ունենա, դա կլինի ԱՄՆ նախագահ Ջո Բայդենի՝ նորմալ հարաբերությունները վերականգնելու ջանքերի մասը, որոնք շարունակում են լարված մնալ ռազմական բախումների, պատժիչ տնտեսական միջոցների և երկու կողմերի մեղադրանքների պատճառով։
Բլինկենը պլանավորում էր այցելել Պեկին փետրվարին, սակայն չեղարկել է ուղևորությունն այն բանից հետո, երբ ԱՄՆ-ը հայտնաբերել է չինական օդապարիկ, որն անցնում էր ԱՄՆ մայրցամաքով:
