ԱՊՀ եւ ԵԱՏՄ երկրների եվրասիական համագործակցությունն անհրաժեշտ է կառուցել նորարարությունների եւ նոր տեխնոլոգիաների հիման վրա, հայտարարել է ՌԴ վարչապետ Միխայիլ Միշուստինը Սոչիում ԱՊՀ եւ ԵԱՏՄ երիտասարդական երկրորդ համաժողովի բացման ժամանակ, փոխանցում է «ՌԻԱ Նովոստին»։
«Այսօր մենք ունենք այսպիսի ծրագիր՝ «100 գաղափար ԱՊՀ-ի համար»։ Եվ մենք սպասում ենք այս գաղափարներին։ Մեզ համար շատ կարեւոր է կառուցել մեր համագործակցությունն այնպես, որ այն լինի հարմար, հարմարավետ, երիտասարդական։ Այս իմաստով մենք սպասում ենք ձեր արձագանքին»,- ասել է Միշուստինը։
Ինչպես նշել է ՌԴ վարչապետը, ԵԱՏՄ երկրների տարածքում բնակիչների 30 տոկոսը երիտասարդներ են՝ մոտ 55 մլն մարդ։ Միշուստինը հիշեցրել է նաեւ Եվրասիական համալսարանի ստեղծման մասին, որին միացել են 15 բուհեր. «Ուզում եմ ասել, որ Եվրասիական համալսարանում սեպտեմբերի 1-ից կսկսենք մեր մագիստրոսական ծրագիրը»։
«Ընդհանրապես, այսօր մեր համագործակցությունը անհրաժեշտ է կառուցել նորարարությունների, նոր տեխնոլոգիաների, նոր գաղափարների հիման վրա եւ, իհարկե, ամեն ինչ նորից ձեզնից է կախված, մենք ձեզանից սպասում ենք նման գաղափարների»,- ասել է նա։
Նա համաժողովի մասնակիցներին հրավիրել է «Սիրիուսում» կայանալիք Համաշխարհային երիտասարդական փառատոնին, որը կանցկացվի 2024 թվականին։
Միշուստինը չորեքշաբթի ժամանել է Սոչի՝ մասնակցելու Եվրասիական միջկառավարական խորհրդի եւ ԱՊՀ երկրների կառավարությունների ղեկավարների խորհրդի նիստերին։ Ծրագիրը նախատեսված է մինչեւ հունիսի 9-ը։
