Հայաստանում պետական-մասնավոր գործընկերության (ՊՄԳ) առումով մեծ հետաքրքրություն են ներկայացնում էներգետիկ նախագծերը։ Sputnik Արմենիայի թղթակցի փոխանցմամբ՝ Սոչիում Եվրասիական կոնգրեսի շրջանակներում լրագրողներին այս մասին ասաց Եվրասիական զարգացման բանկի (ԵԶԲ) գլխավոր տնտեսագետ Եվգենի Վինոկուրովը։
«Մենք ունենք երկու պոտենցիալ գաղափար։ Մեկը տրանսպորտային միջանցքն է, իսկ երկրորդը պայմանավորված է նրանով, որ Հայաստանն այժմ ավելացնում է էլեկտրաէներգիայի արտադրությունը՝ Իրան վերաարտահանելու ներուժով։ Ըստ այդմ, կարող է ձևավորվել էլեկտրաէներգիայի արտահանման համար գծերի կառուցման միջսահմանային նախագիծ»,- նշել է Վինոկուրովը։
Միաժամանակ, անդրսահմանային ՊՄԳ-ի համար անհրաժեշտ է 2 երկիր, համապատասխանաբար, հայկական համատեքստում անհրաժեշտ է պայմանավորվածություններ ձեռք բերել կա՛մ Իրանի, կա՛մ Վրաստանի հետ։ Եթե երկու երկրների հետ պայմանավորվածություն լինի, ապա այս ՊՄԳ-ն կարող է կայանալ նաեւ Հայաստանում։
Ինչ վերաբերում է տրանսպորտային թեմային, ապա առաջին հերթին անհրաժեշտ է լուծել ռուս-վրացական սահմանի Վերին Լարսի անցակետի խնդիրները։ Այս տեսանկյունից Վինոկուրովը հուսով է, որ անցակետի հզորության ընդլայնման ներդրումային նախագիծը, ինչպես ավելի վաղ հաղորդվել էր, կօգնի Ռուսաստանին և Հայաստանին կապվել ավելի հուսալի տրանսպորտային կառույցի հետ։
Հունիսի 8-ին Սոչիում իր աշխատանքները սկսեց Եվրասիական Կոնգրես-23-ը։ Համաժողովին մասնակցում են ԵԱՏՄ և ԱՊՀ երկրների կառավարության, բիզնեսի, գիտական և փորձագիտական համայնքների ներկայացուցիչներ։
Քննարկման հիմնական թեման Եվրասիական տարածքի ապագան է, միջսահմանային պետություն-մասնավոր գործընկերությունը (ՊՄԳ), պարենային անվտանգությունը, ջրային ռեսուրսները, ներդրումների հնարավորությունները և կապիտալի աճը։
