Ռազմական գործողությունների ակտիվացման ժամանակ ուկրաինական ուժերի շարքերում զգալի կորուստները սպասելի էին։ Հինգշաբթի CNN-ի եթերում նման հայտարարություն է արել Սպիտակ տան ազգային անվտանգության խորհրդի ռազմավարական հաղորդակցությունների հարցերով համակարգող Ջոն Քիրբին։
Նա նշել է, որ մտադիր չէ կոնկրետ տվյալներ ներկայացնել Ուկրաինայի զինված ուժերի շարքերում կորուստների վերաբերյալ։ «Բայց սա պատերազմ է», - հավելել է Սպիտակ տան խոսնակը, նշելով, որ Արտյոմովսկի շուրջը (ուկրաինական անվանումը՝ Բախմուտ) եւ ռազմաճակատի այլ հատվածներում «ծանր մարտեր» են ընթանում:
«Բնականաբար, հաշվի առնելով մարտերի ակտիվացումը, կորուստները սպասելի էին»,- ընդգծել է Քիրբին։ Նա նշել է, որ ԱՄՆ-ն ու նրա դաշնակիցները կկենտրոնանան Ուկրաինային ռազմական աջակցություն ցուցաբերելու վրա։
Հունիսի 8-ին CNN-ը, հղում անելով ԱՄՆ-ի վարչակազմի աղբյուրներին, հայտնել էր, որ ուկրաինական ուժերը զգալի կորուստներ են կրել իրենց հակահարձակման փորձի ժամանակ, քանի որ ռուսական զորքերի դիմադրությունը սպասվածից ավելի ուժեղ է եղել։ Խոսքը ինչպես տեխնիկայի, այնպես էլ մարդկային կորուստների մասին է։ Միեւնույն ժամանակ, ամերիկյան վարչակազմի ներկայացուցիչները պնդում են, որ կորուստները չեն ազդի ուկրաինական հակահարձակման ավելի լայն ծրագրերի վրա։
