ՆախընտրելիՏավուշի մարզի Վանաձոր-Բագրատաշեն ճանապարհի սողանքային գոտում, այս պահի դրությամբ, աշխատում է շուրջ 70 փրկարար` Տավուշի, Լոռիի մարզային եւ հրշեջ-փրկարարական ջոկատներից, Երեւանից մեկնած հատուկ փրկարար ջոկատից:
Ինչպես NEWS.am-ին հայտնեցին ԱԻՆ մամուլի ծառայությունից, պարբերաբար տեղացող անձրեւը եւ սողանքի դեռեւս ակտիվ վիճակը բարդացնում են որոնողափրկարարական աշխատանքները եւ հնարավորություն չեն տալիս գործի դնել ծանր տեխնիկան (ֆոտոռեպորտաժ):
Տեղում աշխատանքներն առայժմ իրականացվում են ձեռքի ուժով` բահերի եւ այլ գործիքների օգնությամբ:
Վաղ առավոտից դեպքի վայրում է գտնվում նաև ՀՀ ԱԻ նախարար Արմեն Երիցյանը, ով տեղում ղեկավարում է որոնողափրկարարական աշխատանքները:Հիշեցնենք, որ հոկտեմբերի 2-ին, ժամը 19.03-ին M6 միջպետական մայրուղու 83-րդ կիլոմետրում Վանաձոր-Բագրատաշեն հատվածում` Այրում երկաթուղային կայարանի կամրջի մոտ (Լճկաձոր գյուղի հատվածում) տեղի է ունեցել սողանք: 130 մ երկարությամբ եւ 60 մ բարձրությամբ հողազանգվածը լցվել է ճանապարհին եւ այն ամբողջովին դարձրել անանցանելի: Սողանքից տուժել է 36 ավտոմեքենա, անհայտ կորած է համարվում 7 մարդ:
