«Ռուսաստանի փոստը» («Почта России») ուղիղ ավիափոխադրումներ է գործարկել Միներալնիե Վոդիից Երեւան։ Այս մասին ՏԱՍՍ-ին հայտնել են փոստային օպերատորի մամուլի ծառայությունում։ «Ռուսաստանի փոստն» «Ազիմուտ» ավիաընկերության հետ ստորագրել է համաձայնագիր Միներալնիե Վոդիի Լերմոնտովի անվան օդանավակայանից Հայաստանի մայրաքաղաք կանոնավոր չվերթերով միջազգային ծանրոցների ամենօրյա փոխադրման շուրջ։ Այժմ Ստավրոպոլի երկրամասից եւ Հյուսիսային Կովկասի հանրապետություններից փոստի հաճախորդների ծանրոցները Երեւան կհասցվեն ուղիղ գծով՝ շրջանցելով Մոսկվան», - հայտնել են մամուլի ծառայությունում։
Լերմոնտովի անվան օդանավակայանի համար Երեւանը առաջին միջազգային փոստային ուղղությունն է։ «Ռուսաստանի փոստը» նաեւ դիտարկում է Միներալնիե Վոդիի օդանավակայանում ապագայում փոստային փոխանակման լիարժեք միջազգային կետի բացման հնարավորությունը։ Ինչպես պարզաբանել է «Ռուսաստանի փոստի» էլեկտրոնային առեւտրի Հյուսիսային Կովկասի մակրոտարածաշրջանի փոխտնօրեն Վիտալի Աֆանասեւը, որի խոսքը մեջբերված է հաղորդագրության մեջ, երթուղով ուղիղ հաղորդակցությունը լրջորեն կկրճատի փոստային առաքումների ժամանակը։ Թեստերի ավարտից հետո դա կհանգեցնի ծառայության արժեքի նվազման՝ լոգիստիկական շղթայի օպտիմալացման շնորհիվ։ Աֆանասեւը հավելել է, որ «Ռուսաստանի փոստը» Միներալնիե Վոդիից Երեւան ուղիղ չվերթերի գործարկմամբ նախատեսում է կրկնապատկել Հայաստանի մայրաքաղաք ուղարկվող ծանրոցների քանակը։ Այսպես, 2022 թվականին դրանց թիվը եղել է հազարից փոքր-ինչ ավելի:
