Եվրոպայի խորհրդի դիրեկտիվ մարմինը՝ նախարարների կոմիտեն, կոչ է արել Թուրքիային բանտից ազատել բարերար եւ իրավապաշտպան Օսման Քավալային եւ քուրդ քաղաքական գործիչներ Սելահաթթին Դեմիրթաշին եւ Ֆիգեն Յուքսեքդաղին: Կոմիտեն նաեւ հայտարարել է, որ կարող է պատժամիջոցներ սահմանել արդեն սեպտեմբերին, եթե Անկարան չկատարի այդ պահանջները, հաղորդում է Balkan Insight-ը:

Նախարարների կոմիտեի նիստը տեղի է ունեցել հունիսի 5-7-ին: Որոշման համաձայն՝ սեպտեմբերին կոմիտեի նիստում քննարկման համար պետք է պատրաստվի պատժամիջոցների հնարավոր տարբերակները որոշող փաստաթուղթ։

Balkan Insight-ի տվյալներով՝ միջոցառումները ներառում են նաեւ Թուրքիայի հեռացումը Եվրոպայի Խորհրդից։ 

Կոմիտեն ընդգծել է, որ Քավալայի ձերբակալությունը ողջամիտ հիմքեր չի ունեցել եւ կոչ է արել անհապաղ ազատ արձակել նրան, ինչպես նաեւ ազատ արձակել քրդամետ Ժողովրդադեմոկրատական կուսակցության նախկին համանախագահներ Դեմիրթաշին եւ Յուքսեքդաղին: