Սալվադորի խորհրդարանը փոփոխություններ է կատարել կազմակերպված հանցավորության դեմ պայքարի մասին օրենքում, որոնք թույլ են տալիս խմբային դատավարություններ իրականացնել նույն ավազակախմբի անդամների հանդեպ՝ արագացնելու համար դատավճիռների կայացումը։
«Այդ փոփոխությունները գործիք են, որը թույլ կտա հանրապետության գլխավոր դատախազությանը նախաձեռնել անցումային դատավարություններ հանցավոր կազմակերպության մեղադրվող խմբի հանդեպ»,- նշվել է օրենսդրական մարմնի կայքում։
Օրենսդիրների մտահղացմամբ՝ այս միջոցը թույլ կտա «արագացնել դատավարությունները» արտակարգ դրության ռեժիմի (որը Սալվադորում մտցվել է երկրի նախագահ Նայիբ Բուքելեի նախաձեռնությամբ 2022թ. մարտին՝ հանցավորության դեմ պայքարն ուժեղացնելու նպատակով) գործողության շրջանակում կալանավորվածների նկատմամբ։ Իշխանությունների տվյալներով՝ այդ ընթացքում հանցավոր խմբավորումների գործունեությանն ունեցած հանցակցության մեղադրանքով կալանավորվել է մոտ 72 հազար մարդ։ Օրենսդիրները նաեւ հավանություն են տվել ավազակախմբերի պարագլուխների առավելագույն պատժաժամկետի ավելացմանը՝ 45-ից հասցնելով 60 տարվա։
Սալվադորի իշխանությունների տվյալներով՝ արտակարգ դրության ռեժիմ մտցնելը թույլ է տվել 2022թ. կրկնակի կրճատել սպանությունների թիվը՝ 495 դեպք, որոնց 65 տոկոսն, ի դեպ, կատարվել է մինչեւ հատուկ միջոցների ընդունումը։
