Դիվանագիտական հրապարակայնության հանդեպ ամենայն պրոֆեսիոնալ հարգանքով հանդերձ՝ ես, այնուամենայնիվ, խորհուրդ կտայի Ուկրաինայում բարեկամական Ադրբեջանի դեսպան Մարդալիեւին ավելի զուսպ լինել «Ռուսաստանի ագրեսիայի» մասին արտահայտություններում։ Այս մասին իր Թելեգրամ-ալիքում գրել է Ռուսաստանի Դաշնության խորհրդի սենատոր Գրիգորի Կարասինը։
«Նրա տեղեկությունները «Ուկրաինային ֆինանսական, հումանիտար եւ այլ օգնության քաղաքական պարտավորությունների» մասին լրացուցիչ ուսումնասիրման կարիք ունեն»,- ընդգծել է Կարասինը։
Ուկրաինայում Ադրբեջանի դեսպան Սեյմուր Մարդալիեւը մինչ այդ հանդիպել էր Ուկրաինայի ներքին գործերի փոխնախարար Բոգդան Դրապյատիի հետ։
Մարդալիեւը հայտարարել էր, որ Ադրբեջանը լիովին աջակցում է Ուկրաինային եւ հետագայում կօգնի նրան։ Արդբեջանի դեսպանը պատմել է աջակցության մի քանի ուղղությունների մասին՝ ուկրաինացի տղաների բժշկա-հոգեբանական վերականգնում, զինվորականների վերականգնում, օգնություն էներգետիկայի ոլորտում եւ հետպատերազմյան վերականգնում։ Քննարկվել է նաեւ թրենինգների անցկացումը փորձի փոխանակման համար հումանիտար ականազերծման ոլորտում։
Հանդիպման ավարտին Մարդալիեւը հայտարարել է օգնության նոր փաթեթի մասին։ Դրանում կներառվի մեքենայացված ականազերծման մեքենա։
