Դելիի ազգային մայրաքաղաքային օկրուգի իշխանությունները ծրագրում են G20-ի գագաթնաժողովի ժամանակ վախեցնել մակակներին լանգուրների ստվարաթղթե ֆիգուրների եւ հատուկ պատրաստված մասնագետների օգնությամբ, որոնք կկրկնօրինակեն նրանց ճիչերը: Այս մասին հայտնել է քաղաքի անտառտնտեսության վարչությունը։
Մակակները պարբերաբար խնդիրներ են առաջացնում քաղաքային իշխանությունների համար։ Նրանք մեծ խմբերով բնակություն են հաստատում զբոսաշրջիկների շրջանում հայտնի օբյեկտների կամ մարդաշատ վայրերի մոտ՝ դրանով խոչընդոտելով երթեւեկությանը: Կենդանիների ագրեսիվ վարքի դեպքերը հազվադեպ չեն, երբ նրանք մարդկանցից սնունդ են գողանում: Այս կապակցությամբ քաղաքային իշխանությունները արդեն մի քանի տարի է՝ խնդրի լուծման ուղիներ են փնտրում։
Գագաթնաժողովի ընթացքում քաղաքային վարչակազմը անտառային տնտեսության դեպարտամենտի հետ համատեղ որոշել է օգտագործել լանգուրների կերպարը, որոնցից վախենում են մակակները:
«Ստվարաթղթե լանգուրները կգործարկվեն փորձարարական կարգով։ Մենք պետք է գնահատենք, թե դա որքանով կազդի այդ շրջաններում մակակների թվաքանակի վրա»,-ասել է Նյու Դելիի վարչակազմի ղեկավարի տեղակալ Սաթիշ Ուպադհյայը:
