Եվրոպայի խորհրդի խորհրդարանական վեհաժողովի իրավական եւ մարդու իրավունքների հարցերի կոմիտեն մտահոգություն է հայտնել Ռուսաստանի Սահամանդրության այն լրացումների լեգիտիմության առիթով, որոնք ՌԴ նախագահ Վլադիմիր Պուտինին թույլ են տվել իշխանությունում մնալ մինչեւ 2036թ.։ Այս մասին տեղեկացրել են ԵԽԽՎ մամուլի ծառայությունում։
Խոսքն այն լրացումների մասին է, որոնք ՌԴ Սահմանադրություն են մտցվել 2020թ. հուլիսին։ Այդ լրացումները նախատեսում են նախագահական ժամկետի սահմանափակումների չեղարկում եւ թույլ են տալիս Պուտինին մնալ պաշտոնին մինչեւ 2036թ., երբ կլրանա նրա 83 տարին։
«Նախագահի հսկայական իշխանությունը, պաշտոնում երկարատեւ գտնվելու արդյունքում՝ որեւէ զսպման եւ հակակշռի բացակայության պայմաններում, ինչպիսին են ուժեղ խորհրդարանը, անկախ դատական համակարգը, ազատ լրատվամիջոցները եւ ակտիվ քաղաքացիական հասարակությունը, Ռուսաստանի Դաշնությունը վերածել է փաստացի դիկտատուրայի»,- հայտարարել են խորհրդարանականները։
Կոմիտեն միաձայն հավանություն է տվել բանաձեւի նախագծին եւ հիշեցրել է Եվրոպայի խորհրդի Վենետիկի հանձնաժողովի եզրակացություններն այն մասին, որ «գործող նախագահի լիազորությունների ժամկետի սահմանափակումից հրաժարումը խախտում է ինչպես Ռուսաստանի Սահմանադրությունը, այնպես էլ միջազգային իրավական սկզբունքները»։
Ռուսական ագրեսիան Ուկրաինայի դեմ եւ դրա հետեւանքները ցուցադրում են, որ դիկտատուրաները «սպառնալիք են ներկայացնում միջազգային խաղաղությանն ու անվտանգությանը, նրանց հարեւանների տարածքային ամբողջականությանն ու քաղաքական անկախությանը», ուստի «դեմոկրատիայի վերականգնումը Ռուսաստանում համապատասխանում է առաջին հերթին Ռուսաստանի ժողովրդի, ինչպես նաեւ Եվրոպայի եւ ամբողջ աշխարհի շահերին», ամփոփել է կոմիտեն։
Կոմիտեն նաեւ հաստատել է իր աջակցությունն ապագա հատուկ միջազգային քրեական տրիբունալին՝ Ռուսաստանի ղեկավարությանը, ներառյալ նախագահ Պուտինին, նրանց գործողությունների պատճառով պատասխանատվության ենթարկելու համար՝ սկսած Ղրիմի անօրինական անեքսիայից, Դոնբասում պատերազմից եւ MH17 չվերթի ինքնաթիռը խփելուց։
Այս թեմայով բանակռիվները ԵԽԽՎ-ում տեղի կունենան հաջորդ ամիս։
