Սեպտեմբերի 14-ին ՆԳՆ ՓԾ Արագածոտնի մարզային փրկարարական վարչության կողմից Թալին քաղաքի Քոթանյան 11 հասցեում գտնվող շինությունում կազմակերպվել և անցկացվել է «Փրկարարական և որոնողական աշխատանքների կազմակերպում և իրականացում ուժեղ երկրաշարժի դեպքում» թեմայով ցուցադրական հատուկ տակտիկական ուսումնավարժություն։

ՀՀ ՆԳՆ փրկարար ծառայությունից NEWS.am-ին հայտնում են, որ ուսումնավարժությունը ղեկավարել է Արագածոտնի մարզային փրկարարական վարչության պետ, փ/ծ գնդապետ Դ․ Պետրոսյանը, ներկա են գտնվել Թալին համայնքի ղեկավարի տեղակալ Ս․ Ավետիսյանը, համայնքապետարանի աշխատակիցները։

Ուսումնավարժությանը ներգրավվել էին Թալինի հրշեջ-փրկարարական ջոկատից երկու մարտական հաշվարկ, Թալինի ոստիկանության օպերատիվ խումբը, շտապ բուժօգնության ծառայության մեկ բրիգադ, «ՀԷՑ» ՓԲԸ-ի Մուսալեռ մասնաճյուղի և «Գազպրոմ Արմենիա» Արագածոտնի ԳԳՄ Թալինի տեղամասի վթարային ծառայությունների խմբերը։

Ցուցադրական հատուկ տակտիկական ուսումնավարժության նպատակներն էին՝ կատարելագործել արձագանքող ուժերի գործնական հմտություննրը՝ փրկարարական և վթարավերականգնողական աշխատանքների իրականացման ժամանակ, ստուգել ուժերի և միջոցների տակտիկատեխնիկական հնարավորությունները, բարելավել ներգրավված ուժերի փոխհամագործակցությունը։

Ավարտին ուսումնավարժության ղեկավարը, ամփոփելով կատարած աշխատանքները, դրական է գնահատել մասնակիցների գործողությունները, կարևորել ներգրավված ուժերի պատրաստվածությունը և ներդաշնակ փոխհամագործակցությունը։