Առողջապահության համաշխարհային կազմակերպության ղեկավարը Պեկինին կոչ է արել լրացուցիչ տեղեկություններ տրամադրել COVID-19-ի ծագման մասին և պատրաստ է ուղարկել երկրորդ թիմը՝ ուսումնասիրելու այդ հարցը, գրում է Financial Times-ը։
«Մենք պնդում ենք, որ Չինաստանը տրամադրի լիարժեք մուտք, և մենք խնդրում ենք երկրներին բարձրացնել այդ հարցը իրենց երկկողմ հանդիպումների ժամանակ՝ խրախուսել Պեկինին համագործակցել», - թերթին ասել է ԱՀԿ գլխավոր տնօրեն Թեդրոս Ադանոմ Գեբրեյեսուսը:
ԱՀԿ-ի ղեկավարի մեկնաբանությունները հնչում են այն ժամանակ, երբ ամբողջ աշխարհում առողջապահական մարմինները և դեղագործական ընկերությունները պայքարում են պատվաստանյութերը թարմացնելու ուղղությամբ՝ նոր ձևավորվող կորոնավիրուսային տարբերակների դեմ պայքարելու համար:
Գեբրեյեսուսը երկար ժամանակ պնդում է, որ Չինաստանը փոխանցի իր տեղեկությունները COVID-19-ի ծագման մասին՝ ասելով, որ քանի դեռ դա տեղի չի ունեցել, բոլոր հիպոթեզները մնում են ուժի մեջ։
Վիրուսը առաջին անգամ հայտնաբերվել է Չինաստանի Ուհան քաղաքում 2019 թվականի դեկտեմբերին, և շատերը կասկածում էին, որ այն տարածվել է ողջ կենդանիների շուկայից։ Աշխարհում մոտ 7 միլիոն մարդ է մահացել կորոնավիրուսից։
