Մենք ողջ գիշեր անցկացրել ենք Հանրապետության հրապարակում, հետեւել ենք նաեւ իրադարձություններին Արցախում, մեր անձնական կապերով, լրահոսով. Վիճակը շատ-շատ ծանր է: Այս մասին այսօր՝ սեպտեմբերի 20-ին, Հանրապետության հրապարակից ուղիղ եթերով հայտնեց «Մայր Հայաստան» դաշինքի ղեկավար Անդրանիկ Թեւանյանը:
«Արցախում վճռվում է Հայաստանի ճակատագիրը, մեր պետականության ճակատագիրը: Մենք ունենք միայն մեկ հնարավորություն այս պահին լուծելու հայաստանի ու Արցախի խնդիրները. Նիկոլ Փաշինյանը շատ վաղուց պաշտոնապես ձեռքերը լվացել եւ հրաժարվել է Արցախից: Նա արցախահայությանը հանձնել է թշնամուն, այն, ինչ հիմա տեսնում ենք, Նիկոլ Փաշինյանի վարած քաղաքականության հետեւանքն է: Միակ տարբերակը, որ մենք կարողանանք պաշտպանել Արցախը եւ կարողանանք տեր կանգնել ՀՀ-ին, Հայաստանում իշխանափոխության իրականացնումն է, Նիկոլ Փաշինյանի հեռացումն է, նոր կառավարության ձեւավորումն է, որը կկարողանա կազմակերպել Արցախի պաշտպանությունը եւ տեր կանգնել Հայաստանին»,-ասաց Թեւանյանը:
«Պետք է ոտքի կանգնենք` անկախ մեր ունեցած ցանկացած տարաձայնությունից։ Պետք է համազգային գործադուլ և դասադուլ իրականացնել Երևանում և մարզերում։ Գործադուլը չի վերաբերում միայն առաջնային նշանակություն ունեցող ոլորտներին` դեղատներ, հիվանդանոցներ, հացի գործարաններ»,– ընդգծեց Թևանյանը։
Նա կոչ արեց բոլորին հավաքվել Հանրապետության հրապարակում եւ պարտադրել Նիկոլ Փաշինյանի հրաժարականը. «Նախնական որոշել ենք երեկոյան ժամը 7-ին մեծ հանրահավաք նշանակել Հանրապետության հրապարակում, մինչ այդ կիրականացնենք կազմակերպչական աշխատանքներ: Ժամը 7-ին բոլոր կուսակցությունները պետք է ներկա լինեն, մենք միասնաբար կարող ենք հասնել փոփոխությունների: Պետք է ստեղծվի կառավարման կամիտե կամ օպերատիվ շտաբ»,-ասաց Թեւանյանը:
Առավել մանրամասն՝ տեսանյութում:
