Ամերիկացի զինվորները չորեքշաբթի կավարտեն հայ զինվորականների հետ համատեղ զորավարժությունները Հայաստանում, ինչպես ծրագրված էր՝ չազդելով Ադրբեջանի կողմից խոշոր ռազմական գործողության մեկնարկի վրա, հայտնում է Reuters-ը՝ վկայակոչելով ամերիկացի զինվորական պաշտոնյային։
Նրա խոսքով, 10-օրյա Eagle Partner 2023 զորավարժություններում 85 ամերիկյան և 175 հայկական զինծառայողների մասնակցությամբ փոփոխություններ չեն եղել, չնայած երեքշաբթի օրը Ադրբեջանը այսպես կոչված «հակաահաբեկչական» գործողություն է սկսել Արցախում։
«Մենք գիտեինք, որ նրանք (ադրբեջանցիները – խմբ.) գործողություններ էին իրականացնում, բայց չէինք համարում, որ մեր զինվորների համար վտանգ կա, և այդ պատճառով նրանք մնացին զորավարժությունների ընթացքում»,- ասաց նա։
