Հայաստանը եղել եւ մնում է մեր շատ կարեւոր դաշնակիցը, գործընկերը, մեր մերձավոր երկիրը։ Այս մասին հայտարարել է Կրեմլի ներկայացուցիչ Դմիտրի Պեսկովը։
«Մենք նաեւ շարունակում ենք շփումները Ադրբեջանի հետ, նա նույնպես շատ կարեւոր մեր գործընկերն է։ Մենք շարունակում ենք մեր շփումները նաեւ Ղարաբաղի հայերի հետ»,- ասել է նա՝ մեկնաբանելով Հայաստանի Անվտանգության խորհրդի քարտուղար Արմեն Գրիգորյանի խոսքերը, որը հայտարարել էր, որ ՌԴ խաղաղապահներն իբր չեն կատարում իրենց պարտականությունները։
Պեսկովն ընդգծել է, որ չնայած մեղադրանքներին՝ Մոսկվան շարունակում է շփումները Բաքվի եւ Երեւանի հետ։
Կրեմլի ներկայացուցչի խոսքով՝ ներկայում դե յուրե խոսքը Ադրբեջանի գործողությունների մասին է իր տարածքում, ուստի ՌԴ-ն չի ընդունում մեղադրանքներն իր հասցեին։ «Հայկական կողմը Ղարաբաղը ճանաչել է ադրբեջանական տարածքի անքակտելի մաս։ Ներկայում այդ ամենը էապես փոխել է մի շարք դրույթներ, եւ մենք չենք ընդունում այդ մեղադրանքները մեր հասցեին, մանավանդ որ [կա] հայկական կողմի որոշումը Ղարաբաղը Ադրբեջանի մաս ճանաչելու մասին։ Դե յուրե այժմ խոսքը Ադրբեջանի Հանրապետության գործողությունների մասին է իր տարածքում»,- ավելացրել է նա՝ հայտարարելով, որ տարածաշրջանում ստեղծված ճգնաժամում Մոսկվան նաեւ հենվում է եռակողմ պայմանավորվածությունների վրա։
