Հայաստանի Ազգային ժողովի շենքի մոտ բողոքի ակցիա է ընթանում։ Մարդկանց խորհրդարանի մոտ հավաքվելու կոչ էր արել «Ժողովրդական համախմբում» կուսակցության նախագահ Սուրեն Պետրոսյանը.
Նա մի քանի թեզեր հնչեցրեց.
- Հայաստանի իշխանությունները լվացել են իրենց ձեռքերը Արցախից և չեն կարողանում երաշխավորել Արցախի և Հայաստանի անվտանգությունը, ուստի անհրաժեշտ է իշխանափոխություն։
- Բայց իշխանափոխությունն ինքնանպատակ չէ, դա անհրաժեշտ, բայց ոչ բավարար պայման է, պետք է լինեն խորքային փոփոխություններ, որոնք կբերեն այս ճգնաժամի հաղթահարմանը։
«Այսօր մի իրավիճակում ենք, երբ, ցավոք սրտի, հասարակության մոտ գեներացվում է այդ պահանջը, որ մարդիկ ուզում են գործողություն, առաջնորդություն, բայց չկան այդ գործողությունները:
Մենք ունենք հստակ մեր անելիքները եւ այլեւս չենք խոսելու հասարակության հետ, թե ինչքան ծանր է մեր վիճակը, հայության վիճակը: Բոլորը դա գիտեն, բոլորին հետաքրքիր է, թե ինչ է լինելու սրանից հետո, ով է ստանձնում պարտավորություն եւ ինչ գործողություններ են արվելու: Այդ գործողությունների սկիզբն այսօր դրվելու է:
Սա այլեւս համազգային ճգնաժամ է, իսկ նման դեպքում չեն կարող գործընթացի մեջ ներգրավված լինել միայն մի քանի քաղաքական գործիչներ»,-ասաց նա:
Սուրեն Պետրոսյանը կոչ արեց չհավատալ այն մարդկանց, որոնք ասում են, որ դրա համար պետք է ճանապարհային քարտեզներ, ծրագրեր, խորհրդի նիստեր.
«Չկա նման բան, նայեք աշխարհում փոփոխությունների, հեղափոխությունների քարտեզը, տրամաբանությունը: Եթե ուզում եք շարժում մարեք՝ խոսեք հաստիքներից, պաշտոններից, ծրագրերից: Այս պահին կարեւորը իշխանափոխություն է, որի համար պետք է լինի համընդհանուր կամք, որն անպայման ձեւավորվելու է»,-ընդգծեց քաղաքական գործիչը:
Սուրեն Պետրոսյանն ասաց, որ ինքը մասնակցել է ՀՅԴ գրասենյակում 30 ընդդիմադիր կուսակցությունների հավաքին, սակայն այս հավաքին միավորման գաղափար չի հնչել, և որևէ գաղափարի շուրջ կոնսենսուս չի կայացել։ Նա նշեց, որ, իր կարծիքով, քաղաքական ուժերի և մարդկանց համախմբման գործընթացը պետք է ունենա բոլորովին այլ բովանդակություն և այլ որակ․ «Մենք այլ ուղղությամբ ենք գնում»։
Հարցին, թե ինչպես է հնարավոր հասնել իշխանափոխության առանց ճանապարհային քարտեզի, նա պատասխանեց, որ այդ ճանապարհային քարտեզն, իրականում կա, հասարակության հետ իրենց շփման առարկան պետք է լինի այդ քարտեզի քննարկումը. «Հասարակությանը պետք չէ ծանրաբեռնել դրանով, հասարակությանը պետք են հստակ գործողություններ, եւ այն մարդիկ, որոնք այդ գործողություններն առաջնորդում են, ունենան հստակություն, վճռականություն եւ հետ չկանգնելու կամք»:
Պետրոսյանը մեծագույն միֆ համարեց պնդումը, թե նման ճգնաժամային իրավիճակում չի կարելի գնալ իշխանափոխության, քանի որ դա կարող է տանել կործանման. «Եթե մենք հիմա չգնանք փոփոխությունների, մենք վերջնականապես տապալվելու ենք: Այս պրոցեսի մեջ պետք է ներգրավվեն նաեւ սփյուռքի ներկայացուցիչները եւ մոտ օրերս ներհոսք լինելու է»:
