Ես ներկա եմ եղել 30 ընդդիմադիր կուսակցությունների հանդիպմանը, բայց ես որեւէ բան ոչ ստորագրել եմ, ոչ էլ միավորվել եմ, որովհետեւ միավորման գաղափար, որպես այդպիսին, չի էլ եղել: Այս մասին այսօր՝ սեպտեմբերի 21-ին, Ազգային ժողովի դիմաց բողոքի ակցիայի ժամանակ լրագրողների հետ զրույցում նշեց «Ժողովրդավարական համախմբում» կուսակցության ղեկավար Սուրեն Պետրոսյանը:
«Որեւէ գաղափար չի եղել, որի հետ կոնսենսուսով բոլորը համաձայնել են: Այդ հանդիպումից ես դուրս եմ եկել այնպես, որ դա ուղղակի ընթացիկ պրոցես էր, որտեղ իրենք հետագայում պետք է հասկանան գործընթացները»,-ասաց նա:
Դիտարկմանը, որ ԱԺ «Հայաստան» խմբակցության պատգամավոր Իշխան Սաղաթելյանը հայտարարել է, որ երկու հարցում եղել է համաձայնություն, Սուրեն Պետրոսյանն արձագանքեց. «Գուցե էլի մի հանդիպում է եղել: Այն հանդիպմանը, որին ես ներկա եմ եղել, որեւէ համաձայնություն գործողությունների շուրջ չի եղել: Անձամբ մենք այդ պրոցեսի մաս, ֆորմալ եւ ոչ ֆորմալ առումով, չկանք: Մեր խորին համոզմամբ, այն գործընթացը, որ պետք է տեղի ունենա, պետք է ունենա, պետք է ունենա ամբողջությամբ այլ բովանդակություն, այլ ճանապարհ, այլ որակ: Մենք այլ ուղղությունով ենք գնում»,-ասաց նա:
Սուրեն Պետրոսյանը նկատեց, որ իրենք խնդիր ունեն ոչ թե ժողովրդի ներգրավման, այլ ժողովրդին ճիշտ ուղղորդելու եւ գործողության տանելու. «Ամեն ինչ կարելի է փոխել, այն համատարած տրամադրությունները, որ կան մասնավորապես սոցիալական ցանցերում, որտեղ համատարած ողբ եւ սուգ է տիրում, դա պետք է փոխել: Եթե մենք ուզում ենք խնդիր լուծել, յուրաքանչյուր մարդ պետք է կարողանա այդ ողբն ու սուգը փոխարինել պայքարով, որեւիցե բան վերջնականապես կորած չէ, ամեն ինչ հնարավոր է շտկել, փոխել: Բայց դրա համար պետք է ձեւավորվի հանրային կամք: Ողբի ու անզորության մթնոլորտը չի կարելի շարունակել:
