«Ժողովրդավարական համախմբում» կուսակցության ղեկավար Սուրեն Պետրոսյանն ու մի խումբ քաղաքացիներ ԱԺ-ի դիմաց բողոքի ակցիայի ժամանակ հայտարարեցին զանգվածային հացադուլ՝ Գարեգին Նժդեհի արձանի մոտ՝ պահանջելով համախմբվել հանուն Հայաստանի և Արցախի փրկության հոգևոր դասին, մտավորականներին ու քաղաքական գործիչներին։
Իր խոսքում Սուրեն Պետրոսյանն ասաց. «Մենք այստեղ խոսելու ենք հտակ անելիքներից եւ գնալու ենք հստակ գործողության եւ կրելու ենք ողջ պատասխանատվությունը բոլոր հնարավոր իրավիճակներում: Որեւէ նահանջ չի լինելու: ԵՈթե տեղյակ եք, արդեն մարտերը տեղի են ունենում Ստեփանակերտում: Այստեղ կա երկու տարբերակ. Մի տարբերակը համակերպվելն է, հանձնվելը, մյուս տարբերակը պայքարելը: Մեզ շարունակ վախեցրել են, որ եթե գնաք գործողության, ապա բոլորիս սպառնում է պատերազմ: Սա մեծագույն սուտ: Պատերազմից սարսափելի բան կա՝ անզեն մորթվելը:
Սա այլեւս համազգային պայքար է, միայն քաղաքական ուժերի պայքար չէ: Սա համազգային ճգնաժամ է եւ պետք է հասարակության բոլոր շերտերը ներգրավված լինեն պայքարում»:
Նա երաշխավորեց, որ որեւէ փոփոխության արդյունքում նախկին վարչակարգի վերադարձ չի լինելու. «Մենք յաստեղից շարժվելու ենք Գարեգին Նժդեհի արձանի մոտ եւ այս պահին հայտարարում ենք զանգվածային հացադուլ, որի նպատակը ոչ թե իշխանություններից ինչ-որ բան պահանջելն է, այլ որ հոգեւորականները, այդ թվում վեհափառը, բոլոր մտավորականները հասարակության տարբեր շերտերի ակտիվ ներկայացուցիչներ, բոլորը պետք է գան եւ լուծում լինելու: Բոլորը պետք է մասնակից դառնան այդ պայքարին: Հացադուլի նպատակն է, որ բոլորը հավաքվեն մի տեղ»,-հայտարարեց Սուրեն Պետրոսյանը՝ հավելելով, որ այդ միասնությունից հետո լինելու են հստակ գործողություններ:
Այս ելույթից հետո հայտարարվեց, որ հիմա երթով մեկնում են Գարեգին Նժդեհի արձանի մոտ, սակայն երբ կլինի համախմբումը, կվերադառնան Ազգային ժողով, քանի որ փոփոխությունները լինելու են այստեղ:
