Կիևին սպառազինության մատակարարումը դադարեցնելու մասին Վարշավայի հայտարարությունները Վաշինգտոնում անհանգստություն են առաջացրել․ ԱՄՆ-ը մտադիր է խորհրդակցություն անցկացնել Լեհաստանի հետ։ Այս մասին լրագրողների համար ճեպազրույցում ասել է ազգային անվտանգության հարցերով ԱՄՆ նախագահի օգնական Ջեյք Սալիվանը։
«Երբ այսօր կարդացի վերնագրերը, իհարկե, մտահոգվեցի և հարցեր առաջացան իմ մեջ: Բայց, ինչպես հետագայում տեսա, Լեհաստանի կառավարության ներկայացուցիչը պարզաբանեց, որ իրականում Լեհաստանի արտադրած սարքավորումների, այդ թվում՝ հաուբիցների տրամադրումը շարունակվում է, և որ Լեհաստանը. շարունակում է աջակցել Ուկրաինային»,- ասել է նա։ «Մենք կշարունակենք խորհրդակցել նրանց հետ, որպեսզի լիովին հասկանանք, թե ինչպիսին է Լեհաստանի դիրքորոշումն այս հարցերի վերաբերյալ: Բայց ես հավատում եմ, որ Լեհաստանը կշարունակի աջակցել Ուկրաինային», - հավելել է Սալիվանը:
Լեհաստանի վարչապետ Մատեուշ Մորավեցկին այս շաբաթ ասել է, որ Վարշավան այլևս Կիևին զենք չի մատակարարում։ Նա աել է, որ իր երկիրն այժմ ժամանակակից զենքեր է ձեռք բերում իր բանակի համար և արդեն մեծ պատվերներ է կատարել։ Ավելի ուշ Մորավեցկիի խոսքերը բացատրել է Լեհաստանի կառավարության մամուլի քարտուղար Պետր Մյուլլերը՝ նշելով, որ հանրապետության իշխանությունները Ուկրաինային են փոխանցում միայն այն զենքերը, որոնց մատակարարման մասին ավելի վաղ պայմանավորվածություն էր ձեռք բերվել։
Լեհաստանի նախագահ Անջեյ Դուդան, ելույթ ունենալով TVN24-ի եթերում, պարզաբանել է, որ երկրի իշխանությունները մտադիր չեն Ուկրաինային ժամանակակից զենք փոխանցել, որը նրանք գնում են իրենց բանակի համար։
