Միավորված ազգերի կազմակերպությունը պետք է կատարի իր պարտականությունները պաղեստինցի ժողովրդի հանդեպ, որը շարունակում է տառապել Իսրայելի օկուպացիայի տակ և չի կարող իրականացնել ինքնորոշման իր օրինական իրավունքը: Այս մասին ՄԱԿ-ի Գլխավոր վեհաժողովի 78-րդ նստաշրջանի ամբիոնից հայտարարել է Պաղեստին պետության նախագահ Մահմուդ Աբասը։
«Մենք պահանջում ենք, որ միջազգային հանրությունը պաշտպանի պաղեստինցիներին և օգնի նրանց ազատվել օկուպացիայից»,- ասել է նա։ «Իրավիճակը, որում գտնվում է մեր ժողովուրդը ավելի քան 75 տարի, արդեն անտանելի է, ուստի ես կոչ եմ անում Անվտանգության խորհրդին խաղաղության համաժողով անցկացնել Մերձավոր Արևելքի վերաբերյալ՝ բոլոր կողմերի մասնակցությամբ, որոնք շահագրգռված են կարգավորել Պաղեստինի հարցը»:
Աբասը Իսրայելին պատասխանատու է համարել բանակցային գործընթացի խափանման համար, որը ներառում էր երկու պետությունների համակեցության խնդրի լուծումը: Նա Իսրայելի կառավարությանը մեղադրել է օկուպացված տարածքների բնակիչների նկատմամբ ռասիստական վերաբերմունքի մեջ։ «Երբ ես այստեղ կանգնած եմ ձեր առջև, օկուպացիոն ուժերը և հրեա վերաբնակները շարունակում են հարձակվել մեր ժողովրդի վրա, վախեցնել խաղաղ բնակիչներին, քանդել տները և գրավել ունեցվածքը», - ընդգծել է նախագահը:- «Օկուպանտների գնդակներից ամեն օր մարդիկ են մահանում».
Աբասի խոսքով՝ Իսրայելը «մարտահրավեր է նետում միջազգային օրինականությանը և ձգտում է փոխել պատմական, աշխարհագրական և ժողովրդագրական իրողությունը»։ «Օսլոյի խաղաղության համաձայնագրերից 30 տարի անց, որից Իսրայելն ամբողջությամբ հրաժարվեց, մենք դեռ հույս ունենք, որ ՄԱԿ-ը կկարողանա իրականացնել իր բանաձևերը, որոնք պահանջում են դադարեցնել իսրայելական օկուպացիան և անկախ, ինքնիշխան Պաղեստին պետության ստեղծել՝ Արևելյան Երուսաղեմ մայրաքաղաքով եւ1967 թվականի հունիսի 4-ի դրությամբ սահմաններով»,- ասել է նախագահը։
